Следчы камітэт распачаў крымінальную справу ў дачыненні да рэктара УА «Дзяржаўны інстытут павышэння кваліфікацыі і перападрыхтоўкі кіраўнічых работнікаў і спецыялістаў» Міністэрства гандлю РБ Наталлі Каралёвай.
Як паведамілі ў Следчым камітэце, Наталлі Каралёвай інкрымінуецца здзяйсненне злачынства, прадугледжанага ч.3 арт.210 Крымінальнага кодэкса Беларусі (крадзеж шляхам злоўжывання службовымі паўнамоцтвамі, здзейснены ў буйным памеры). Санкцыя гэтага артыкула прадугледжвае пакаранне да 10 гадоў пазбаўлення волі з канфіскацыяй маёмасці.
Паводле папярэдніх дадзеных, рэктар Дзяржаўнага інстытута павышэння кваліфікацыі і перападрыхтоўкі кіраўнічых работнікаў і спецыялістаў здзейсніла крадзеж сродкаў установы на суму амаль 35 мільёнаў рублёў.
Для гэтага была выкарыстаная схема фіктыўнага працаўладкавання, якая апошнім часам стала вельмі папулярнай у дзяржустановах.
Так, паводле дадзеных следства, Н. Каралёва ўладкавала на пасаду спецыяліста па маркетынгу сваю знаёмую, якая лічылася на ёй з ліпеня 2011 года па верасень 2013. Аднак увесь гэты час жанчына на працы не з'яўлялася і свае працоўныя абавязкі не выконвала. Пры гэтым ёй спраўна налічвалася заработная плата, якую, лічаць следчыя, рэктар прысвойвала сабе. Такім чынам, амаль за тры гады падазраваная паклала сабе ў кішэню 34,.9 млн рублёў.
У цяперашні час праводзяцца следчыя мерапрыемствы, падчас якіх плануецца высветліць усе астатнія нюансы знаходжання Н. Каралёвай на сваёй пасадзе.
Каментары