«Адкрываецца кармушка, заглядвае гэты *ёбак Вадзім у акулярчыках і кажа: «Ну што ты, Сахарок!»
Былы брэсцкі міліцыянер Руслан Сахарчук, які вёў блог пра Афрыку, а пасля стаў палітвязнем, расказаў, чаму з'ехаў у Польшчу.
Былы палітвязень Руслан Сахарчук перабраўся ў Польшчу.
«Пачынаю жыццё з чыстага ліста. Мяне ў Беларусі нічога не трымае, там ні дома ўжо, ну, нічога няма. Куплю сабе кватэру ў Польшчы і машыну. Пайду працаваць. Я маю права атрымаць від на жыхарства праз паўгода. Усё. Я нават акардэон з сабой прывёз, новы, Weltmeister», — заяўляе мужчына ў кароткім відэа.
Руслану Сахарчуку 49 гадоў, ён з Брэста. Скончыў Магілёўскі вышэйшы каледж МУС, пасля працаваў у Ленінскім РАУС Брэста. Даслужыўся да звання капітана міліцыі. У 2008 годзе яго звольнілі з органаў за «здзяйсненне дыскрэдытуючых учынкаў».
Пазней у жыцці Сахарчука з’явілася Афрыка. Ён перыядычна бываў у Кеніі і вёў YouTube-блог From Africa to Belarus. Мужчына расказваў пра жыццё і працу ў Афрыцы, мясцовых людзей і ўласныя прыгоды.
Але ў 2025 годзе былы міліцыянер сам стаў героем ужо зусім іншай гісторыі. Яго прызналі вінаватым у «распальванні варожасці» і прызначылі хімію з накіраваннем.
«Я не самы святы чалавек. … Але я, напэўна, не заслужыў, 15 гадоў аддаўшы службе радзіме, каб мяне не папярэдзіўшы проста вось… [За] 10 дзён была распачата крымінальная справа. Па ўсіх законах мне павінны былі паведаміць, я не купляў бы за $900 квіток у Кенію.
Але следчы Рыбачук сказаў: «Не, у мяне шмат спраў, мне не было калі. А пакуль ідзі сядзі дома. Скажы дзякуй, што мы цябе не штурмавалі з «Рыссю», там, «Белкай», «Тарнада». Проста сядзі дома, і мы прыйдзем», — расказвае Сахарчук.
У сваім маналогу Сахарчук з крыўдай згадвае і час за кратамі.
«Павінен два разы на ноч прачытаць даклад, назваць прозвішча, там: Cахарчук Руслан Сцяпанавіч, артыкул 130, схільны да экстрэмізму і іншай дэструктыўнай дзейнасці… Адчыняецца кармушка, зазірае ўсмешлівы хлопец Вадзім і кажа: «Ну што ты, сахарок?» І вось у гэты момант, хлопцы, не было ўжо ў маіх мазгах дарогі назад. Я стаў «сахарком». Вось гэты *ёбак Вадзім у акулярчыках: «Ну што ты, Сахарок?»… Пачвара».
У іншым відэа на сваім канале, які цяпер носіць назву «Першы Харызматычны», Сахарчук расказаў, што на свабодзе ён шэсць месяцаў, а пра выезд з краіны пачаў думаць ці не ў самы першы дзень знаходжання ў ІЧУ.
«Каму што ў Беларусі я зрабіў дрэннага? Я мужна прайшоў праз усе гэтыя пытанні. Дом быў прададзены ўжо тры месяцы назад. Пашпарт заменены. Усе гэтыя аперацыі былі толькі з адной мэтай: мець магчымасць вось так спакойна размаўляць на любыя тэмы».
Сахарчук заўважае, што яму «ледзь не ва ўрачыстай абстаноўцы» вярнулі ваенны білет. Аднак ён не разумеў свайго становішча:
«Знаходзіцца ў краіне ў статусе раней судзімага, хадзіць адзначацца ў званні маёра… (…) Хто я, зэчара ці я маёр міліцыі ў запасе, у выпадку чаго там магу камандаваць батальёнам? Я ўвогуле не разумеў, што адбываецца, як яно далей будзе. (…) Я думаю, што ў мяне ўсё атрымаецца».
Каментары