Як паведамляе сайт ведамства, на электронны адрас Генпракуратуры паступіла больш за 500 ідэнтычных зваротаў грамадзян з просьбамі аб узмацненні адказнасці за жорсткае абыходжанне з жывёламі
і надзяленні службовых асоб МУС правам складаць пратаколы аб адміністрацыйных правапарушэннях за здзяйсненне такіх правапарушэнняў. Аналагічныя прапановы былі разгледжаны Генпракуратурай у студзені гэтага года на падставе ліста Нацыянальнага цэнтра заканадаўства і прававых даследаванняў і зваротаў арганізацый па абароне жывёл, адзначаецца ў паведамленні.
«На нашу думку, жорсткае абыходжанне з жывёламі, вынікам якога становіцца не толькі яго гібель, але і калецтва, калі яно здзейснена з хуліганскіх, карыслівых або іншых нізкіх меркаванняў, мае грамадскую небяспеку, уласцівую злачынству, бо такое дзеянне па сваім змесце і скіраванасці замахваецца на грамадскую маральнасць і прычыняе значную шкоду інтарэсам, якія ахоўвае крымінальнае заканадаўства», — адзначылі ў Генпракуратуры.
У сувязі з гэтым Генпракуратура ўзгадніла з некаторымі заўвагамі прапанаваную Нацыянальным цэнтрам заканадаўства і прававых даследаванняў рэдакцыю артыкула 339-1 Крымінальнага кодэкса (жорсткае абыходжанне з жывёламі), а таксама падтрымлівае прапанову аб тым, каб надаць службовым асобам МУС права складаць пратаколы на падставе артыкула 15.45 КаАП, аб чым праінфармаваны Цэнтр заканадаўства і прававых даследаванняў.
Раней прапанову аб узмацненні жорсткасці адказнасці за негуманнае абыходжанне з жывёламі падтрымала Міністэрства замежных спраў. У канцы студзеня ў адказ на зварот арганізацый па абароне жывёл МЗС паведаміў, што ў 2013 годзе ўносіў прапановы ў Адміністрацыю прэзідэнта аб вызначэнні прававых асноў абыходжання з жывёламі і ўзмацненні жорсткасці адказнасці за негуманнае абыходжанне з імі. У выніку адміністрацыя даручыла Нацыянальнаму цэнтру заканадаўства і прававых даследаванняў сумесна з зацікаўленымі дзяржаўнымі органамі вывучыць мэтазгоднасць уключэння ў праект плана заканатворчай дзейнасці на 2015 год праекта закона, які вызначае прававыя асновы абыходжання з жывёламі.
Акрамя таго, цэнтру даручана вывучыць мэтазгоднасць узмацнення жорсткасці адказнасці за негуманнае абыходжанне з жывёламі ў рамках работы над законапраектам, які знаходзіцца ў палаце прадстаўнікоў і прадугледжвае карэкціроўку крымінальнага заканадаўства і заканадаўства аб адміністрацыйных правапарушэннях.
