Чаму Расія выпусціла Януковіча на сцэну менавіта сёння? Заява яго была пустой і кароткай, апухлы твар сведчыў пра магчымыя праблемы з сэрцам. Чаму ж ён з’явіўся на публіцы 11 сакавіка?
Нагадаем, што першая прэс-канферэнцыя Януковіча адбылася 28 лютага, а на наступны дзень Рада Федэрацыі Расіі прыняла шокавае рашэнне аб дазволе на ўвод войскаў ва Украіну.
Органы ўлады ва Украіне патроху кансалідуюцца. Ім удалося затрымаць некалькі дзясяткаў штурмавікоў і дыверсантаў у Данбасе. Яшчэ некалькі дзён — і «пратэсты» там пойдуць на спад.
Сёння Вярхоўная Рада Украіны мае абмеркаваць закон аб стварэнні Нацыянальнай гвардыі.
Гэтая сілавая структура мае паўстаць на добраахвотнай аснове, гэта значыць, што яе базу складуць сілы Самаабароны Майдану. Нацыянальная гвардыя, такім чынам, стане першай баяздольнай у распараджэнні ўкраінскага ўрада. Зброі для яе Украіна мае досыць. Пасля яе стварэння Украіна перастае быць безабароннай і будзе здольная аказаць пэўны супраціў.
Расіі патрэбная эканамічна слабая, палітычна падзеленая і вайскова безабаронная Украіна. Менавіта таму Расія можа зрэагаваць на стварэнне Гвардыі новым прэвентыўным ударам.
«Я не толькі легітымны прэзідэнт, але і галоўнакамандуючы», — нагадаў Януковіч.
Магчыма, з'яўленне Януковіча не было выпадковым. Не выключана, сёння-заўтра Украіну можа чакаць новы віток напружання.
Тактыка Расіі ў дачыненні да Украіны гэтыя дні нагадвае яе дзеянні ў Рэчы Паспалітай у XVIII ст. Тады Расія выкарыстоўвала для ўмяшання ва ўнутраныя справы нагоду «абароны праваслаўных», ва Украіне – «рускамоўнага насельніцтва». Тады Расія паслядоўна спыняла любыя спробы кіраўнікоў РП стварыць баяздольнае войска, аздаравіць палітычную сістэму і эканоміку.
Пад самымі рознымі падставамі: нават «абароны спрадвечных правоў шляхты». Нарэшце, скарыстаўшы міжнароднае становішча, яна пачала адгрызаць па кавалу ад тэрыторыі.
Пуцін разумее, што як толькі Украіна вернецца да эканамічнага росту, незадавальненне на ўсходзе Украіны распаліць будзе цяжэй.
Так, як усход не патрабаваў далучэння да Расіі пры «аранжавай уладзе», якая – цяпер на гэта глядзіш інакш – давяла золатавалютныя рэзервы краіны да 37 мільярдаў даляраў.
Былы дарадца Пуціна Андрэй Іларыёнаў мяркуе, што задача-максімум Крамля — далучыць да Расіі або прынамсі заняць Адэсу і Данбас. Так можна будзе гарантаваць вода- і энергазабеспячэнне Крыма і адрэзаць Украіну ад мора і нафтагазавага шэльфа. Іларыёнаў мяркуе, што дзеля дасягнення гэтай мэты Пуцін гатовы пайсці ва-банк.
Трывожна прагучала і заява прэзідэнта Літвы Далі Грыбаўскайце.
Учора на Літоўскім тэлебачанні яна заявіла, што Расія нават не думае аб адступленні і захаванні ўласнай годнасці.
Па словах Грыбаўскайце, на саміце ў Брусэлі на мінулым тыдні стала ясна, што некаторыя еўрапейскія лідары да канца не ўсведамляюць сітуацыю, у якой апынуліся Расія і Еўропа.
«Сёй-той казаў, што нельга зараз аказваць на Расію занадта вялікі ціск — каб даць ёй магчымасць захаваць свой твар і пакінуць ёй «стратэгію адступлення». Я ясна сказала: Еўропе трэба захаваць свой твар, а не Расіі, якая не збіраецца гэтага рабіць. Еўропа яшчэ да канца не разумее, што адбываецца, і да канца не разумее, што настаў час самой Еўропе вызначыцца і захаваць свой твар», — сказала прэзідэнт Літвы.
Апытанка
-
«Гісторыя поўная нечаканасцяў, і не ўсе яны непрыемныя». Пісьменніца Крысціна Сабаляўскайце паразважала пра ВКЛ, Беларусь і Расію
-
Статкевіч прапанаваў лозунг, які аб’яднае большасць беларусаў
-
Губарэвіч спрабуе ўзяць Бабарыку на слабо: «Ёсць апасенні, што не атрымаецца пераадолець прахадны бар’ер на выбарах у КР?»
Каментары