Арганізатары Дня Волі заклікаюць прыходзіць на акцыю з украінскай сімволікай
Арганізатары шэсця і мітынгу 25 сакавіка з нагоды Дня Волі — чарговай гадавіны абвяшчэння Беларускай Народнай Рэспублікі — заклікаюць грамадзян прыходзіць на акцыю з нацыянальнай беларускай і ўкраінскай сімволікай.
Аб гэтым паведаміў адзін з заяўнікаў акцыі, старшыня Партыі БНФ Аляксей Янукевіч 21 сакавіка на прэс-канферэнцыі ў Мінску.
«Адна з ключавых тэм акцыі — салідарнасць з Украінай. Мы будзем раздаваць стужачкі ў колерах украінскага і нацыянальнага бел-чырвона-белага сцяга. Заклікаем і саміх грамадзян прыносіць сцягі, а таксама плакаты і транспаранты, прысвечаныя абвяшчэнню БНР і адносна агрэсіі Расіі ў дачыненні да Украіны», — сказаў ён.
Янукевіч таксама паведаміў, што на мітынгу плануецца прыняць рэзалюцыю аб салідарнасці з Украінай.
Лідар аргкамітэта па стварэнні аб'яднання «Маладыя хрысціянскія дэмакраты» Марына Хоміч, якая таксама з'яўляецца заяўнікам акцыі, адзначыла, што ў Мінгарвыканкаме звярнулі ўвагу на тое, што на акцыі павінна выкарыстоўвацца толькі зарэгістраваная сімволіка, да якой сімволіка стваранай партыі «Беларуская хрысціянская дэмакратыя» не адносіцца.
«Мы заклікаем прыносіць украінскія сцягі, бо яны сёння з'яўляюцца большымі антыдыктатарскімі сімваламі, чым партыйныя сцягі», — сказала яна.
Збор удзельнікаў акцыі пачнецца ў 18.00 каля кінатэатра «Кастрычнік», затым адбудзецца шэсце па праспекце Незалежнасці і вуліцы Сурганава да парку Дружбы Народаў, дзе з 19.30 да 20.00 павінен прайсці мітынг.
Цяпер чытаюць
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»3535
Каментары