Актывіст Аб'яднанай грамадзянскай партыі Антон Жылко, кандыдат у дэпутаты Мінскага гарадскога савета, судом Партызанскага раёна Мінска прыгавораны да пяці сутак арышту на падставе часткі 1 артыкула 23.34 Кодэкса аб адміністрацыйных правапарушэннях (правядзенне несанкцыянаванай акцыі). Такое рашэнне прыняла 24 сакавіка суддзя Вольга Паўлоўская.
Пры гэтым Жылко застанецца на волі да абскарджання рашэння суда.
Актывіста затрымалі 21 сакавіка прыкладна ў 16.15 каля ўваходу на станцыю метро «Трактарны завод», за дзве гадзіны да яго сустрэчы з выбаршчыкамі. Разам са сваёй даверанай асобай Ганнай Канапацкай кандыдат раздаваў запрашэнні на сустрэчу, якая павінна была прайсці ў СШ № 87, а таксама ўлёткі пра тое, што 25 сакавіка ў Мінску адбудзецца акцыя з нагоды Дня Волі.
Нягледзячы на тое што шэсце і мітынг у Дзень Волі дазволеныя Мінгарвыканкамам, у дачыненні да Жылко складзены пратакол аб адміністрацыйным правапарушэнні. Прыкладна праз тры гадзіны яго адпусцілі, уручыўшы позву з прадпісаннем з'явіцца 24 сакавіка да 10.30 у суд Партызанскага раёна.
«Нягледзячы на тое што я праводзіў санкцыянаваны перадвыбарны пікет, суд палічыў, што я парушыў правілы правядзення масавых мерапрыемстваў, заклікаючы прыйсці на Дзень Волі. Паводле рашэння суда, гэта не можа быць часткай маёй перадвыбарнай праграмы», — сказаў Жылко БелаПАН.
«Я ацэньваю рашэнне суда як спробу мяне «падвесіць» на некаторы перыяд, каб я сябе паводзіў больш асцярожна ў сваёй палітычнай дзейнасці. Акрамя гэтага, я з'яўляюся яшчэ кандыдатам у дэпутаты, пакуль не падведзеныя вынікі выбараў 23 сакавіка, і ўладам не хацелася б, каб прайшла інфармацыя пра мой арышт. Таму яго рашэнне было адкладзена да абскарджання», — лічыць актывіст.
Ён паведаміў, што пасля таго, як атрымае на рукі дакументы аб рашэнні суда, абмяркуе сітуацыю з адвакатам і абскардзіць бліжэйшым часам судовае рашэнне.
Цяпер чытаюць
«У сына на тэлефоне былі налепленыя сцяг і герб Расіі. З гэтага ўсё пачалося». Бацька школьніка з Баранавіч расказаў, як яго сына цкавалі аднакласнікі18
Каментары