Лідар метал-гурта Gods Tower збіраецца балатавацца ў прэзідэнты
Лідар легендарнага гомельскага метал-гурта Gods Tower Уладзіслаў Наважылаў (сцэнічны псеўданім Лэслі Найф) аб'явіў у сацсетках пра намер балатавацца на пасаду прэзідэнта Беларусі.
Музыкант стварыў уласны сайт, на якім апублікавана яго перадвыбарная праграма. Ён, у прыватнасці, піша: «Калі я стану прэзідэнтам, першым чынам выдам указ аб пабудове ў Беларусі касмадрома і правядзенні ўласнай Алімпіяды. Акрамя таго, мы запатрабуем вярнуць нам усе нашы спрадвечныя землі ад Айдаха да Плутона. Мы не станем разменьвацца на танкі, самалёты і кулямёты. Мы пабудуем сваю Зорку Смерці з чаркай і скваркай! Галоўнае што? Галоўнае, каб скафандр не ціснуў! А там і да эканомікі дабярэмся».
Лэслі Найф пазіцыянуе сябе як «былога касмічнага пірата». «У нас будуць самыя вялікія ўраджаі, міжгалактычныя трактары і Вялікі хакейны калайдар!» — абяцае ён.
Адным з пунктаў перадвыбарнай праграмы музыканта з'яўляецца легалізацыя карупцыі. «Нельга ігнараваць факт перанасычанасці нашага грамадства карупцыяй. Я прызнаю, што гэта прыроджаная хвароба. Таму, у адрозненне ад іншых палітыканаў, я прапаноўваю карупцыю легалізаваць. Мы пабудуем дамы карупцыі, цэлыя вуліцы рыжых ліхтароў, дзе чыноўнікі змогуць займацца карупцыяй у парадку індывідуальнага прадпрымальніцтва. Такім чынам, мы папоўнім бюджэт і знойдзем сродкі на будаўніцтва касмадромаў на вёсцы, а таксама на мадэрнізацыю касмічнага флоту», — піша Лэслі Найф.
На пасадзе прэзідэнта ён таксама мае намер развіваць касмічную праграму. «Абгрунтавана сцвярджаю, што на гэты момант справа касманаўтыкі ў нашай краіне знаходзіцца ў глыбокай чорнай дзірцы, таму адразу пасля майго прыходу да ўлады асігнаванні на гэтую галіну народнай гаспадаркі будуць шматкроць павялічаныя.
Я хачу, каб кожны беларус мог пры жаданні зляпаць ракетаплан у падвале з наяўных дэталяў бытавой і сельскагаспадарчай тэхнікі.
Для гэтага мы сур'ёзна перагледзім агульнанацыянальную праграму адукацыі на карысць астраноміі, прыкладной касманаўтыкі і дамашняга ракетабудавання. У выніку любы беларус будзе здольны пры дапамозе самагоннага апарату вырабляць самы сапраўдны гептыл і акісляльнік!», — піша музыкант.
У каментары БелаПАН Уладзіслаў Наважылаў растлумачыў, што яго кампанія — «не больш чым спроба пасмяяцца над выбарамі ў Беларусі».
«Калі з дапамогай СМІ зробім рэзананс, то чаму б не? Шансы — няважна, галоўнае — паспрабуем разгайдаць лодку, дакладней, разварушыць балота. Метады перадвыбарнай кампаніі і тэхналогіі мы прыменім сітуацыйныя, радыкальныя, але безбалючыя. Беларусы занадта мала ўсміхаюцца, таму ў іх эканоміка дэпрэсіўная. А ўсміхаючыся, і да Марса пешкі дойдзеш», — перакананы лідар гурту Gods tower.
Каментары