«Вольва», «Таёта», «Мэрсэдэс». Каментар пад паведамленнем пра «патрыятычны аўтапрабег» сабраў рэдкасную колькасць лайкаў
З 7 па 11 верасня ў Беларусі праходзіў рэспубліканскі гісторыка-патрыятычны аўтапрабег «Сімвал адзінства — 2026». Як заяўлялі арганізатары, удзельнікі рухаліся «дарогай памяці — ад рубяжоў 1939 года да адзінай, моцнай Беларусі» па маршруце Мікашэвічы — аграгарадок Ленін — Стоўбцы — Глыбокае — Верхнядзвінск.
Кароткае відэа пра тое, як калона з 23 аўтамабіляў пад чырвона-зялёнымі сцягамі і ў суправаджэнні спецмашын ДАІ заязджае ў Глыбокае, з’явілася ў сацсетцы Threads на праўладным канале «Глубокое. Без фильтров», які мае ўсяго 25 падпісчыкаў. За кароткі час публікацыя сабрала больш за 125 тысяч праглядаў і сотні каментароў.
Проста каласальную колькасць лайкаў атрымала іранічная заўвага:
«Вольва, Таёта, Лексус, Мерседэс, Шэўрале, Фольксваген! Ну так, сапраўды вельмі патрыятычна…»
Гледачы масава звяртаюць увагу на неадпаведнасць дэклараваных каштоўнасцяў і выбару транспарту:
«Машыны аніяк не для патрыётаў»; «А дзе беларускі аўтапрам? МТЗ?»; «Павінны быць усе Geely!»;«А дзе ж народная джылііі?».
«Адзінства з еўрапейскім аўтапрамам», — кпіць нехта.
«Гультаі, вы б што-небудзь карыснае зрабілі», «За нашы грошы падаткаплацельшчыкаў арганізаваны, вялікі дзякуй» — кпяць гледачы.
«І ўсе ўдзельнікі, напэўна, узялі адпачынкі, каб паўдзельнічаць у такой падзеі. Не можа ж быць так, каб яны ў працоўны час хернёй займаліся…», — іранізуе адзін з чытачоў.
«Хутчэй за ўсё, яны яшчэ і камандзіровачныя атрымаюць…», — адказваюць яму.
Карыстальнікі мяркуюць, што ў калоне едуць «чыноўнікі, менты, работнікі дзяржкантор і іншыя прыкарытнікі», бо, паводле іх меркавання, «ніхто пры здаровым розуме ў такой д’ябальшчыне ўдзельнічаць не будзе».
Звяртаюць увагу беларусы і на аздабленне аўто, выкананае ў парушэнне існуючых правілаў, і на непатрэбнае марнатраўства грошай:
«Нібыта паводле закону РБ нельга ляпіць налепкі на аўтамабіль, бо гэта адцягвае ўвагу кіроўцаў, і за гэта прадугледжана адміністрацыйнае парушэнне з наступным штрафам..?! А як быць з дармаедамі, ці гэта іншае..?!
Пытанне яшчэ ў іншым: хіба пакатушкі па вясковых дарогах папоўняць дзяржаўны бюджэт і зробяць рэспубліку мацнейшай, багацейшай на сусветным узроўні..?!»
Беларусам незразумелы і сэнс мерапрыемства.
«Проста цікава, хто спансуе дадзенае мерапрыемства і сэнс яго? Паказаць, на якіх аўто ездзяць патрыёты?»;
«А навошта вось гэта ўсё? Ствараць людзям перашкоду для праезду па дарогах? Лепш штосьці карыснае зрабілі б, калі такія патрыёты»; «Ёсць пытанне — а навошта наогул арганізоўваць гэтыя аўтапрабегі? Якім чынам гэта паляпшае абстаноўку ў рэгіёне і ў краіне ў цэлым? Навошта выкарыстоўваць дзяржаўныя сімвалы ў такім ключы???»;
«Сімвал адзінства з кім? З чым? У чым сэнс? Што ў гэтым патрыятычнага ці гістарычнага? Гэта выглядае як мінімум вартым жалю».
Некаторыя каментатары паспрабавалі сфармуляваць уласныя адказы на гэтыя пытанні:
«Прабег прыстасаванцаў, каб паказаць адданасць дыктатару»;
«Суправаджэнне ДАІ, куча сем’яў набліжаных, антураж на аўто за кошт бюджэтных сродкаў (народных грошай), ды і самі аўто, не сумняваюся, за гэтыя ж «народныя» грошы, усё гэта ў працоўны час — вось як жывуць «прыкарытнікі».
І ўсё гэта дзеля «прыгожай» карцінкі, каб давесці ўсім «з’ехаўшым» (бо «сваім» і так зразумела) і несяброўскім краінам, як жа любіць беларускі народ Лу. Куча грошай — а выніку «0» (нават, магчыма, «-1»). Багата жывуць барын і баяры».
«А ці размаўляе хоць адзін з гэтых «патрыётаў» на сваёй роднай беларускай мове? Думаю не. За гэта ж грошы не плацяць», — заўважае іншы чалавек.
Некаторым гледачам праезд калоны з сімволікай нагадаў жалобную працэсію.
Пры гэтым сярод сотняў каментароў пад відэа не знайшлося ніводнага водгуку ў падтрымку мерапрыемства.
Цяпер чытаюць
У расійскай арміі беларускага наёмніка павесілі на дрэве ўніз галавой і білі палкай па геніталіях14
Каментары
Эти уже поняли это давныыым давно и от того в этой колбасе ни одного "усатого" авто не наблюдается.