28 мая ў Мінск з афіцыйным візітам паводле запрашэння беларускага ўрада прыбыла адміністратар Праграмы развіцця ААН (ПРААН), намеснік генеральнага сакратара арганізацыі Хелен Кларк.
Паводле інфармацыі прадстаўніцтва ААН у Беларусі, візіт будзе доўжыцца да 31 мая ўключна. Запланаваныя сустрэчы Кларк з высокапастаўленымі беларускімі чыноўнікамі — прэзідэнтам, прэм'ер-міністрам, міністрам замежных спраў.
Падчас візіту намеснік генсакратара ААН плануе наведаць Гомель, Ветку і закрытую зону тэрыторый, што пацярпелі ад аварыі на Чарнобыльскай АЭС. Суправаджаць Хелен Кларк пры палёце ў закрытую зону будзе міністр па надзвычайных сітуацыях Уладзімір Вашчанка.
Пасля вяртання ў Мінск намеснік генсакратара ААН возьме ўдзел у сустрэчы рабочай групы «Украіна — Беларусь — Расія» па чарнобыльскіх пытаннях» на высокім узроўні.
31 мая перад ад'ездам з Мінска Кларк дасць прэс-канферэнцыю ў Ратушы.
Каментары