У Беларусі плануюць аднавіць пойменныя дубровы і асушаныя балоты.
Пра гэта паведаміла на прэс-канферэнцыі 30 ліпеня ў Мінску начальнік упраўлення біялагічнай і ландшафтнай разнастайнасці Міністэрства прыродных рэсурсаў і аховы навакольнага асяроддзя Наталля Мінчанка.
На рэалізацыю дзяржаўнай праграмы развіцця сістэмы асабліва ахоўных прыродных тэрыторый (ААПТ) на 2015—2019 гады будзе выдзелена амаль 120 млрд. рублёў. Больш за 97 млрд. рублёў будзе выдзелена з рэспубліканскага бюджэту, больш чым 16 млрд. — з мясцовых бюджэтаў, каля 6 млрд. — са сродкаў міжнароднай тэхнічнай дапамогі, адзначыла яна.
Дзяржпраграма прадугледжвае правядзенне ў нацыянальным парку «Белавежская пушча» і заказніку «Ельня» мерапрыемстваў па аднаўленні асушаных балот. У нацыянальных парках, Бярэзінскім біясферным запаведніку, заказніках «Спораўскі» і «Званец» — расчыстку хмызняковай расліннасці. У Белавежскай пушчы — стварэнне лесанасеннай базы.
Будуць таксама праводзіцца мерапрыемствы па барацьбе з інвазіўнымі відамі жывёл, якія выцясняюць беларускія абарыгенныя віды, устаноўцы штучных гнёздаў, аднаўленні пойменных дуброў.
«У прыватнасці, праблемы з дубровамі існуюць у нацыянальным парку «Прыпяцкі». Праграмай прадугледжаныя досыць сур'ёзныя сродкі на рэканструкцыю ляснога гадавальніка ў парку для таго, каб вырошчваць пасадачны матэрыял дуба з закрытай каранёвай сістэмай і высаджваць у месцы росту», — сказала Мінчанка.
Акрамя новай дзяржпраграмы, з 2015 года ў Беларусі пачнуць дзейнічаць нацыянальная стратэгія развіцця сістэмы ААПТ да 2030 года і схема рацыянальнага размяшчэння ААПТ на 2015—2024 гады. У стратэгічных дакументах адлюстраваны асноўныя праблемы:аднаўленне высокаўзроставых лясоў, праблемы зарастання нізінных балот, размнажэння інвазіўных відаў жывёл.
Цяпер чытаюць
Ён адкрыта называў расійскіх вайскоўцаў акупантамі, а расійскую ўладу — фашысцкай. За краты кінулі супрацоўніка МТБанка5
Каментары