У Брэсце 21 жніўня завяршыўся першы міжнародны турнір па хакеі на траве «Праметэй».
За галоўны прыз змагаліся чатыры клубы: лідары беларускага хакея на траве брэсцкі «Будаўнік» і ХК «Мінск», расійскія «Дынама» (Электрасталь) і «Тана» (Азоў). Каманды правялі аднакругавы турнір.
У першы гульнявы дзень, 19 жніўня, ХК «Мінск» быў мацнейшы за «Тану» — 5:2, у беларусаў па два галы закінулі Іван Луцэвіч і Аляксандр Ганчароў, адзін раз вызначыўся Мікіта Марцінкевіч. У той жа дзень «Будаўнік» з лікам 1:2 уступіў «Дынама» з Электрасталі. Адзіны гол у брэстаўчан закінуў Іван Кісялевіч.
На наступны дзень «Будаўнік» не пакінуў каменя на камені ад абароны «Таны», лік гульні 9:0. Па два разы вароты расіян бралі Віталь Зышчык і Іван Кісялевіч, па разе вызначыліся Міхаіл Паўловіч, Аляксандр Радзівінавіч, Ігар Ягошчанкаў, Аляксандр Гарчанюк і Аляксандр Лукашык. «Мінск» дзякуючы галам Аляксандра Ганчарова і Мікіты Караля з лікам 2:1 быў мацнейшы за расійскае «Дынама».
У заключны дзень турніру клуб з Электрасталі з лікам 6:2 разбіў «Тану», а ХК «Мінск» пры дапамозе галоў Івана Луцэвіча, Аляксандра Ганчарова і Яўгена Міхейчыка абыграў з лікам 4:2 «Будаўнік» і стаў першым пераможцам «Праметэя».
ХК «Мінск» набраў 9 ачкоў, другое месца з 6 ачкамі ў «Дынама» (Электрасталь), 3 ачкі і трэцяе месца ў «Будаўніка», няма ачкоў і апошняе месца ў «Таны».
Тры з чатырох удзельнікаў турніру «Праметэй» змагаліся за Кубак садружнасці, які завяршыўся 12 жніўня, тады першым на фініш прыйшло «Дынама» з Электрасталі, другімі былі брэстаўчане, трэцімі — мінчане.
Цяпер чытаюць
Вячорка: Сустрэча Сікорскага з Рыжанковым можа ўдарыць па стаўленні да беларусаў у Еўропе23
Вячорка: Сустрэча Сікорскага з Рыжанковым можа ўдарыць па стаўленні да беларусаў у Еўропе
Басіст «Пятлі», яго 18‑гадовы сын і зорка «Разбітага сэрца пацана» — расказваем пра беларускамоўны гурт Prypiać, які прэзентаваў аўтарскую «Калыханку»1111
Каментары