Аляксандр Лукашэнка падтрымаў ідэю стварэння ў Мінску камунальнай гандлёвай сеткі. Аб гэтым ён заявіў сёння, прымаючы з дакладам старшыню Мінгарвыканкама Андрэя Шорца.
Андрэй Шорац паведаміў, што на калегіі ўпраўлення гандлю Мінгарвыканкама было прынята рашэнне стварыць камунальную гандлёвую сетку, якая за кошт прадастаўлення нізкіх цэн будзе садзейнічаць зніжэнню кошту прадукцыі ў буйных сеткавых магазінах. Такім чынам, на яго думку, будзе прапанаваны якасны разнастайны асартымент па прымальных цэнах. На сённяшні дзень прадугледжваецца, што камунальная гандлёвая сетка будзе створана на базе больш як 40 магазінаў. «Гэта будзе як процівага буйным гандлёвым сеткам, якія таксама будуць глядзець на гэтыя цэны, каб не было згавору», — дадаў старшыня Мінгарвыканкама.
«Гэта правільна, гэта рыначная цана, гэта створыць канкурэнцыю на зніжэнне цэн», - падтрымаў ідэю кіраўнік дзяржавы. Разам з тым беларускі лідар лічыць, што камунальнай гандлёвай сеткай, якая складаецца з больш як 40 магазінаў, у двухмільённым горадзе з гасцямі не проста будзе стрымаць цэны ў буйных сеткавых магазінах. «Акрамя гэтых эканамічных рыначных механізмаў неабходна забяспечыць і адміністрацыйны кантроль, перш за ўсё, за прыватным гандлем, каб яны не ўзнімалі цэны. Трымайце гэта пад кантролем», — падкрэсліў Лукашэнка.
Ён лічыць, што камунальную гандлёвую сетку трэба павялічваць, але не ва ўрон самім магазінам. «Яны не павінны быць з-за нізкіх цэн стратнымі», — сказаў беларускі лідар. На думку кіраўніка дзяржавы, камунальная сетка дасць магчымасць ацэньваць сітуацыю ў гандлі ў цэлым, а таксама рэальны кошт тавараў.
«У свой час, калі мне прапанавалі ў Мінску поўнасцю прыватызаваць гандаль, я сказаў «не». І мне ўдалося тады трэць гандлю ў сталіцы пакінуць у кіраванні дзяржавы, галоўная мая мэта была ў тым, каб бачыць працэсы, якія адбываюцца ў гандлі, кіруючы гэтай дзяржуласнасцю», — адзначыў Лукашэнка. Таму, на думку кіраўніка дзяржавы, мэру Мінска не трэба баяцца пашыраць сферу дзяржаўнага гандлю, не стрымліваючы пры гэтым прыватны.
«Мяне прасілі прадаць ГУМ, ЦУМ, «Беларусь», я сказаў «не, мы прадаваць пакуль не будзем для таго, каб кантраляваць буйныя магазіны і мець альтэрнатыву ў гандлі». І самае галоўнае, каб гандаль быў празрысты. Таму правільна, што ствараеце камунальныя гандлёвыя сеткі, і іх трэба пашыраць», — сказаў кіраўнік дзяржавы, звяртаючыся да мэра Мінска.
Аляксандр Лукашэнка лічыць, што неабходна падтрымліваць тых, хто будзе працаваць у гэтым камунальным гандлі. «Гэта будзе канкурэнцыя. А галоўнае — можна будзе бачыць працэсы, якія адбываюцца ў гандлі на прыкладзе гэтых магазінаў, — дадаў беларускі лідар. — Дзяржаўны гандаль пакажа, якім павінен быць прыватны. Параўнайце з прыватным гандлем і зрабіце вывад — хлопцы жыруюць ці працуюць са стратамі, а страт мы не можам дапусціць. Можна будзе бачыць структуру затрат у гандлі наогул».
Каментары