Мэрыя перадала забудоўшчыку зямлю з людзьмі: пакуль чакалі перасялення, адна жанчына загінула ФОТА
У Мінску 9 студзеня згарэў прыватны дом на вуліцы Ураджайнай. У полымі загінула гаспадыня. Цяпер высвятляецца, што трагедыі можна было пазбегнуць.
«У той дзень я застаўся дома пазней і зрабіў правільна. Пачуў дзіўны гучны трэск і выйшаў на вуліцу паглядзець. Адразу насустрач выбег малады чалавек, рукі ў яго былі ў сажы і крыві. Ён сказаў, што ў ягоным доме гарыць газавы кацёл. Папрасіў выклікаць пажарных. Суседні дом быў ахоплены полымем. Цудам не ўзарваўся газавы кацёл, што прывяло б да распаўсюджвання агню на іншыя дамы», — расказаў жыхар аднаго з суседніх дамоў Георгій.
Пажарныя прыехалі на месца здарэння ўжо праз сем хвілін. «У выніку пажару пашкоджана маёмасць на кухні, часткова маёмасць у трох сумежных пакоях, драўляныя перагародкі ў доме, перакрыцці на кухні, страха па ўсёй плошчы. Дом не прыдатны для пражывання», — паведамілі ў мінскім гарадскім УМНС.
Пасля ліквідацыі пажару ў доме знайшлі згарэлай гаспадыню — 61-гадовую жанчыну, аднагодку дома. 27-гадовы хлопец наймаў пакой у гаспадыні. Ён праз акно выскачыў з дома — моцна не пацярпеў.
Папярэдняй прычынай пажару ратавальнікі лічаць парушэнне правілаў эксплуатацыі газавага прыстасавання і агрэгатаў (няспраўнасць абагравальнага катла).
Можна было пазбегнуць трагедыі?
«Гэтая сітуацыя ў чарговы раз можа сведчыць пра тое, наколькі пачварна адбываецца нагляд гарадскіх уладаў за будаўніцтвам. Зямля, на якой стаяў згарэлы дом, ужо была перададзена прыватнай кампаніі — забудоўшчыку дома па вул. Чарвякова, 55», — расказаў Георгій. Яго дом таксама падпадае пад знос.
Яшчэ ў снежні 2008 года Мінгарвыканкам прыняў рашэнне аб канфіскацыі шэрагу зямельных надзелаў у грамадзян па вуліцах Чарвякова і Ураджайнай. Іх дамы ішлі пад знос, а на іх месцы меркавалася пабудаваць групу шматкватэрных дамоў. Трэці этап — узвядзенне трэцяга жылога дома — забудоўшчык павінен быў пачаць толькі пасля таго, як адселіць жыхароў, а дамы знясуць (кампенсуе жыхарам іх жытло). Але будоўля ідзе, а людзі застаюцца ў сваіх дамах. Па словах Георгія, забудоўшчык нібыта пагаджаецца на ўмовы жыхароў, але рэальных крокаў па перасяленні не робіць.
Інспекцыя дэпартамента кантролю і нагляду за будаўніцтвам па Мінску выдала забудоўшчыку дазвол на будоўлю 3 этапа яшчэ 17 лютага 2014.
«Тым не менш, фірма да сёння не з усімі ўласнікамі зацвердзіла тэрміны, а таксама парадак кампенсацыі страт і перадачы нерухомасці ўзамен той, што зносяць. Калі б усё было зроблена своечасова, трагедыі б не адбылося».
«НН» звярнулася да забудоўшчыка. Але дырэктар фірмы перастаў адказваць на тэлефанаванні пасля таго, як пачуў пытанне журналіста.
Цяпер чытаюць
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе99
Каментары