«Зусім не тое, што я пісаў першапачаткова»: Джордж Лукас пра новыя «Зорныя войны»
У інтэрв’ю Cinemablend стваральнік «Зорных войнаў» распавёў пра разыходжанні са студыяй Disney.
«Я прадаў Disney не толькі правы на «Зорныя Войны», але і шэраг маіх ідэй і напрацовак па здымках наступных эпізодаў, — распавёў Лукас. — Але, аказалася, яны не захацелі іх выкарыстоўваць і вызначылі будучыню сусвету самастойна. Тое, што вы ўбачыце ў сёмым эпізодзе — зусім не тое, што я пісаў для яго першапачаткова».
Што дзіўна, раней славуты рэжысёр сцвярджаў, што не планаваў працягаў дзвюх трылогій. Ён лічыў гісторыю завершанай, бо «Зорныя войны» — гісторыя асабістай трагедыі Анакіна Скайуокера, які стаў Дартам Вэйдэрам.
«Калі Вэйдэр памёр, то ён ужо не ўваскрэсне, Імператара не клануюць, а Люк ні з кім не ажэніцца», — казаў ён раней пра непрыняцце ў «канон» коміксаў па матывах «Зорных войн».
Тым не меней, у інтэрв’ю 1983 года Марк Хэміл, выканаўца ролі Люка Скайуокера ў эпізодах IV-VI, сцвярджае, што абмяркоўваў з Лукасам планы на працяг эпапеі.
«Аднойчы ён сказаў мне, што я мог бы згуляць Люка зноў, але ў амплуа духоўнага настаўніка тыпу Обі-Вана Канобі, які перадае эстафету новаму пакаленню джэдаяў. Я ўдакладніў, калі ж мы ўжо зможам пачаць здымкі, а ён сказаў, што гэта здарыцца не раней 2011 года», — казаў Хэміл і памыліўся толькі на 3 гады, здымкі працягу з ім у гэткай ролі стартавалі ў 2014 годзе.
Сам Лукас кажа, што яго не вельмі цікавіць работа над новым фільмам: «Вой, можаце не пытаць ў мяне пра трэйлер. Я яго яшчэ не глядзеў. Мне падабаецца глядзець фільмы цалкам у кінатэатры, а не разглядаць кароткія трэйлеры. Калі кіно выйдзе ў пракат — тады і пагляджу».
Чытайце таксама: 25 фактаў пра новыя «Зорныя войны»
Каментары