Такія вынікі даў перапіс насельніцтва, праведзены расійскімі ўладамі.
У часе перапісу ўвосень 2014 года ўкраінцы і беларусы Крыма масава запісваліся — або іх масава запісвалі — рускімі. У выніку доля рускіх у насельніцтве рэзка вырасла. Адначасова кожны пяты крымскі татарын спрабаваў запісацца проста татарынам.
Як паведаміла начальніца ўпраўлення статыстыкі насельніцтва і аховы здароўя Федэральнай службы статыстыкі Расіі Святлана Нікіціна, «самай шматлікай нацыянальнай групай насельніцтва на крымскім паўвостраве з'яўляюцца рускія — 1492 тысяч чалавек (68% насельніцтва, якія ўказалі нацыянальнасць). Пра гэта яна расказала на «круглым стале», прысвечаным папярэднім вынікам перапісу насельніцтва. Круглы стол прайшоў у Сімферопалі.
Перапіс насельніцтва ў Крыме праходзіў з 14 па 25 кастрычніка 2014 года, праз 7 месяцаў пасля захопу паўвострава Расіяй.
Колькасць рускіх у часе перапісу 2001 года складала 58% (у 1897 годзе рускіх было 33%, а крымскіх татараў — 35%, паведамляе Вікіпедыя).
Доля ўкраінцаў у Крыме, паводле перапіса, знізілася з 24 да 16%.
Трэцяя па колькасці група — крымскія татары, якіх, паводле перапісу, пражывае 232,3 тысячы чалавек (10,6% насельніцтва). Акрамя таго, паводле дакументаў, яшчэ 45 тысяч чалавек (2%) назвалі сябе татарамі, не назваўшы нацыянальнасць (крымскія татары) цалкам. «Цяпер прынята рашэнне пры апрацоўцы дадзеных татараў з роднай мовай крымскататарскай аднесці да крымскіх татараў», — падкрэсліла Нікіціна.
Караімаў (цюркамоўны народ, што спавядае варыянт юдаізму) засталося 535 чалавек. Крымчакоў — 228 чалавек.
У параўнанні з усеўкраінскім перапісам насельніцтва 2001 года, па словах Нікіцінай, колькасць украінцаў скарацілася на 40%, беларусаў — на 38%.
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў15
Каментары