Праз суботнікі і «дармаедаў» Беларусь трапіла ў лік найгоршых краін па гандлі людзьмі і эксплуатацыі працы
Расія, Паўночная Карэя, Венесуэла, Іран, Лівія, Сірыя, Зімбабвэ… і цяпер мы.
Дзярждэпартамент ЗША апублікаваў (PDF) чарговы даклад аб эксплуатацыі працы і гандлі людзьмі ў розных краінах свету. У ім Беларусь перамясцілася з «другой групы пад наглядам» у трэцюю, найгоршую ў свеце.
З 2011 года беларусы становяцца ахвярамі эксплуатацыі працы часцей не за мяжой, а на радзіме, кажуць у дакладзе. Да таго ж, краіна ў галіне барацьбы з гандлем людзьмі «не адпавядае мінімальным стандартам і не робіць значных высілкаў па выпраўленні гэтага».
Адзначаюцца «спансаваныя дзяржавай» прымусовыя працы на суботніках, «падатак з дармаедаў», адсылка вучняў і студэнтаў на сельгасработы ды вайскоўцаў на невайсковыя задачы, прымусовыя працы падчас «лекавання» алкагалізму і наркаманіі, умовы прымусовай працы ў турмах, «прыгонны» дэкрэт па дрэваапрацоўчай прамысловасці 2012 года ды многія іншыя недапушчальныя па міжнародных стандартах з’явы. Адзначаюцца і недастатковыя, «дэкларатыўныя» высілкі па барацьбе з гандлем людзьмі ды адсутнасць прававога механізму абароны яго ахвяр.
Раней Беларусь мела на мапе руды колер — група 2, але пад пільным назіраннем. То значыць, яна ўваходзіла ў лік краін з сур’ёзнымі праблемамі з прымусовай працай і гандлем людзьмі ды пагрозай перайсці ў лік найгоршых краін свету. У гэтую групу, «пад назіраннем», сёлета ўваходзяць Украіна, Балгарыя, Кітай, Егіпет, Саудаўская Аравія, Куба, Узбекістан, Туркменістан, Пакістан, палова Афрыкі і іншыя.
Трошкі лепшая сітуацыя ў «жоўтых» краін, групы 2, у лік якіх уваходзяць балтыйскія суседзі Беларусі, многія краіны Паўднёвай Еўропы, «шчаслівейшая» палова Афрыкі, амаль уся Цэнтральная і Паўднёвая Амерыка, амаль уся Азія.
Цяпер Беларусь афарбаваная ў чырвоны колер — мы ўвайшлі ў лік 23 найгоршых у свеце краін па прымусовай працы і гандлю людзьмі. Мы поруч з Расіяй, Паўночнай Карэяй, Тайландам, Венесуэлай, Іранам, Лівіяй, Сірыяй, Алжырам, Еменам, Зімбабвэ, Паўднёвым Суданам, Цэнтральнаафрыканскай Рэспублікай і іншымі.
Прэзідэнт ЗША мае права ўвесці супраць «чырвоных» краін санкцыі, не звязаныя з гуманітарнай і гандлёвай супрацай.
Чытайце таксама:
Беларусь не ўвайшла ў сотню міралюбівых краін
Мапа, якая радуе тым, што Беларусь на ёй «белая пляма»
Цяпер чытаюць
Цапкала і Балкунец атакавалі літоўскага палітыка, які дапамагаў беларусам пасля 2020‑га і спрычыніўся да справы, якую завёў пракурор у Гаазе36
Каментары