У Мінску па начах невядомы палюе на катоў са зграяй ягдтэр'ераў
У «Нашу Ніву» звярнулася чытачка з незвычайным паведамленнем. Па яе словах, ноччу ў Мінску хтосьці адмыслова натраўлівае паляўнічых сабак на катоў.
Інэса Кавалёва жыве ў Цэнтральным раёне сталіцы на вуліцы Панфілава.
«Некалькі тыдняў таму жанчына хадзіла па нашым раёне і шукала, хто трымае шмат сабак. Яна расказала, што бачыла, як зграя сабак загрызла двух яе катоў. А потым мы заўважылі, што бяздомныя каты пачалі прападаць. А часам іх трупікі проста валяліся на абочыне», — кажа Інэса.
Вуліца Панфілава — гэта прыватны сектар, свойскіх жывёл там часта выпускаюць ва двары, пагуляць. Пару дзён таму, як звычайна, выпусціла свайго ката і Кавалёва.
«А першай ночы я пачула, што ён дзіка вішчыць. Выскачыла на двор і пабачыла, што яго рве зграя сабак. Прычым гэта былі не дварнягі, а 6—7 дагледжаных ягдтэр’ераў. І калі я выйшла, пабегла да іх, то пачула такі адмысловы свіст, як са спецыяльных свісткоў для дрэсуры, і гэтыя сабакі адразу збеглі ўніз па вуліцы. Значыць, хтосьці стаяў там і назіраў за ўсім гэтым», — распавядае жанчына.
Паглядзець, куды дакладна пабеглі тыя сабакі, Інэса не змагла — яе ўвага была занята катом.
«Ён быў яшчэ жывы, але весь пераламаны. Неўзабаве памёр. Прычым, яны не раздзерлі таго ката, а менавіта задушылі. Значыць, хтосьці дрэсіруе гэтых сабак да палявання на пушнога звера», — мяркуе Кавалёва.
Гэта дакладна не чалавек з раёна, сцвярджае яна, бо суседзі б ведалі. Раніцай жанчына абмяркоўвала выпадак з імі — ніхто нічога не ведаў. Столькі сабак таксама ніхто з тых, хто жыве побач, не трымае.
«Хтосьці адмыслова прыязджае на наш раён, бо тут шмат сваіх і бяздомных катоў, і зацкоўвае іх сабакамі», — кажа Кавалёва.
Інэса падала заяву ў міліцыю. Па яе словах, там з яе пасмяяліся, але заяву прынялі.
«Гэта, натуральна, забойства. Свойская жывёла — гэта ж член сям’і, — кажа Кавалёва. — Тым больш, гэта горад, а не лес. Што ён робіць, той гіцаль?».
«Наша Ніва» звязалася з некалькімі заводчыкамі ягдтэр'ераў, але яны ўпэўнілі, што нічога не ведаюць пра такія выпадкі. Па іх словах, парода не надта рэдкая, падобных сабак трымае шмат хто.
У прэс-службе ГУУС Мінгарвыканкама паведамілі, што, калі камусьці вядома пра аналагічныя выпадкі, то пра гэта трэба неадкладна паведаміць у міліцыю. Ацэньваць дзеянні «паляўнічага» будзе Следчы камітэт, але, падкрэслілі, ў ГУУС, імаверна, злачынцу будзе пагражаць крымінальная справа.
Цяпер чытаюць
«Лукашэнка проста не ведае». Ябацьку, які выкладаў у тыкток відэа пра булінг дачкі, пасадзілі на паўтара месяца4
Каментары