Мастак і музыка Андрусь Такінданг напісаў абразы для Лучайскага касцёла
Да 3 кастрычніка іх можна пабачыць у мінскім Цэнтры сучасных мастацтваў (Някрасава, 3).
У Цэнтры адчынілася выстава Андруся Такінданга «Крыжовы шлях. Дошка, аловак, акрыл». Серыя з 14 абразоў Крыжовага шляху з’явілася як замова для касцёла ў Лучаі.
У сваіх абразах Андрусь Такінданг параўноўвае Крыжовы шлях Езуса Хрыста са штодзённым жыццём чалавека, яго клопатамі, праблемамі, цяжкасцямі, але і радасцю, з крыжовым шляхам кожнага чалавека.
Абразы Крыжовага шляху спалучаны з замалёўкамі з серыі «Магічная мапа», дзякуючы якім ствараецца ўражанне, што Хрыстус крочыць па вуліцах, мястэчках Беларусі і сустракаюць Яго беларускія мужчыны і жанчыны.
Сам Андрусь Такінданг пра сваю выставу кажа: «Пісаў Крыжовы шлях, быццам будаваў дом, касіў траву ці рабіў якую-кольвек простую працу. Літаральны, як батлейка, канкрэтны, як народны іканапіс, словам, – дошка, аловак, акрыл».
Андрусь Такінданг вядомы не толькі як мастак, але і як музыка гуртоў «Рэха» і «Гаротніца», а таксама тэлевядучы.
Наведаць выставу можна да 3 кастрычніка, калі яна завершыцца творчай сустрэчай з Такіндангам у Цэнтры сучасных мастацтваў (Мінск, вул. Някрасава, 3).
Каментары