Учора сойм Партыі БНФ вырашыў пачаць працэдуру вызначэньня свайго кандыдата ў прэзыдэнты на наступных выбарах кіраўніка краіны.
Адметна, што ў сваёй заяве сойм Фронту гаворыць, што возьме ўдзел у вызначэнні адзінага кандыдата на пасаду прэзідэнта Беларусі толькі ў выпадку, калі рашэнне аб працэдуры вызначэння такога кандыдата будзе прымацца кансенсусам прадстаўнікоў усіх суб’ектаў АДС.
Сярод актывістаў так званай аб’яднанай апазіцыі ўжо цяпер, за тры гады да прэзідэнцкіх выбараў, кажуць пра вылучэнне цэлага шэрагу кандыдатаў. Пракаментаваць гэтую сітуацыю мы папрасілі аднаго з лідэраў АДС — старшыню Аб’яднанай грамадзянскай партыі Анатоля Лябедзьку:
‑ АГП была ці не галоўным інвестарам такога палітычнага праекту, як Аб’яднаныя дэмакратычныя сілы. І калі ўсе гэтыя ініцыятывы будуць адбывацца ў межах гэтага агульнага праекта, калі ёсць агульныя задачы, агульныя мэты і агульныя абавязкі, то я стаўлюся да такіх ініцыятываў станоўча. Што да самога вылучэння, то тут, безумоўна, павінны быць адчыненыя дзверы як для партыйных актывістаў, так і для тых, хто не атаясамлівае сябе з нейкай партыяй.
Што да сёлетняй парламенцкай выбарчай кампаніі, у якой ад Партыі БНФ па ўсёй Беларусі ўдзельнічаюць толькі 26 кандыдатаў, то тут, нягледзячы на існаванне ў Беларусі ажно 110 выбарчых акругаў, сябры сойму ўсё ж выказалі падтрымку дзеянням кіраўніцтва партыі.
‑ Я лічу, што на дадзеным этапе партыя да выбараў падрыхтаваная. Безумоўна, кожная партыя перад выбарамі мабілізуецца, шукае нейкія дадатковыя рэсурсы, зараз я яскрава бачу гэта і ў дзеяннях нашай партыі, — кажа ейны старшыня Лявон Баршчэўскі.
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль7
Каментары