Пытанне аб вяртанні ў Мінск пасла Злучаных Штатаў Амерыкі пакуль не абмяркоўвалася, паведаміў часовы павераны ў справах ЗША ў Беларусі Скот Роланд, адказваючы на пытанне БелаПАН 19 кастрычніка пасля цырымоніі адкрыцця памятнай дошкі аб дзейнасці ў Беларусі першай гуманітарнай місіі UNRRA.
Роланд таксама паведаміў, што максімальна пашырыць спіс віз, якія беларускія грамадзяне могуць атрымаць, не выязджаючы з краіны, ЗША зможа толькі пасля паўнацэннага аднаўлення працы свайго пасольства ў Беларусі.
«Мы раімся (па гэтым пытанні) з нашымі калегамі ў Вашынгтоне, — заявіў дыпламат. — Мы разам вырашаем, калі ў нас будуць [спрыяльныя] умовы для пашырэння гэтага спіса. У адзін цудоўны дзень у нас будзе нармальнае пасольства і мы зможам забяспечваць візамі абсалютна ўсіх грамадзян Беларусі. Пакуль гэта абмежаваная колькасць [віз]».
Як паведамлялася раней, член палаты прадстаўнікоў кангрэса ЗША ад штата Каліфорнія Дана Рорабакер 3 жніўня ў Мінску на сустрэчы з Аляксандрам Лукашэнкам прапанаваў Беларусі і ЗША павысіць узровень дыпламатычнага прадстаўніцтва. Парламентарый заявіў, што ЗША хочуць «прасоўваць мір і супрацоўніцтва ў межах рэгіёна і паміж дзяржавамі ўсяго свету», выказаўшы надзею на тое, што «мірныя намаганні пачнуцца менавіта сёння і атрымаюць сваё развіццё». На думку Рорабакера, першым крокам у гэтым кірунку можа быць павышэнне ўзроўню дыпламатычнага прадстаўніцтва і вяртанне пасла ЗША ў Мінск і пасла Беларусі — у Вашынгтон.
Летам мінулага года пасольства ЗША ўпершыню з 2008 года пашырыла спіс візавых паслуг для грамадзян Беларусі. Так, са жніўня 2014 года пасольства пачало прыём зваротаў па візы катэгорый F (студэнт), М (студэнт прафесійна-тэхнічнай навучальнай установы) і J (удзельнік праграмы культурнага абмену). У чэрвені гэтага года пасольства ЗША стала прымаць заяўкі на працяг наяўных і аднаўленне віз, якія закончыліся менш як чатыры гады таму.
Каментары