Дроны з пярцовым спрэем, чатырохногія робаты і штучны інтэлект. Як Японія тэхналогіямі абараняецца ад мядзведзяў
Мядзведзі ўсё часцей заходзяць у населеныя пункты Японіі і нападаюць на людзей. Улады ўжо прыцягвалі вайскоўцаў, змякчалі абмежаванні на паляванне. Цяпер яны звярнуліся да больш высокіх тэхналогій.
Паводле Міністэрства навакольнага асяроддзя краіны, за 2025 фінансавы год мядзведзі паранілі рэкордныя 238 чалавек, яшчэ 13 загінулі. За першыя пяць месяцаў 2026 года пацярпелі 62 чалавекі, шасцёра з іх загінулі, піша The Washington Post.
Даследчыкі называюць некалькі магчымых прычын. Вясковае насельніцтва скарачаецца, людзі пераязджаюць у гарады, і мядзведзі займаюць пакінутыя тэрыторыі. Уплываць могуць таксама змены клімату і змяншэнне колькасці паляўнічых. Звяры ўсё часцей прыходзяць да чалавечага жытла па ежу і менш баяцца людзей.
У вёсцы Сёва для пошуку мядзведзяў прыстасавалі дроны з цеплавізарамі, якія раней набылі для выратавання людзей у гарах. Гэта дапамагае шукаць звяроў там, дзе густыя дрэвы закрываюць агляд звычайнай камеры.
З дапамогай гэтай тэхналогіі ўдалося злавіць дзевяць мядзведзяў. Далейшы лёс жывёлін вырашаюць паводле правіл прэфектуры: іх могуць выпусціць або забіць у залежнасці ад шкоды і абставін з’яўлення.
У горадзе Сэндай камеры са штучным інтэлектам дапамагаюць вызначаць, дзе ставіць пасткі і электрычныя агароджы. Сістэму B Alert навучалі прыкладна на 60 тысячах выяў дзікіх жывёл. Паводле распрацоўшчыкаў, яна распазнае мядзведзяў з дакладнасцю да 99,9%. Яе ўжо выкарыстоўваюць у 29 муніцыпалітэтах.
Іншая каманда ў Токіа стварае карту месцаў, дзе верагодныя сустрэчы з мядзведзямі. Штучны інтэлект аналізуе ранейшыя назіранні, звесткі пра насельніцтва і спадарожнікавыя здымкі. Кіраўнік праекта ацэньвае дакладнасць прагнозу прыкладна на 70%.
Стартап пры Такійскім універсітэце тым часам выпрабоўвае чатырохногіх робатаў. Яны павінны знаходзіць і адпужваць мядзведзяў, пераадольваючы стромкія схілы, завалы і густыя зараснікі.
Выпрабоўваюць і дроны з пярцовым спрэем: на адной з дэманстрацый ролю мядзведзя выконваў супрацоўнік горада ў касцюме звера.
Тэхналогіі дапамагаюць і паляўнічым. У Сібэцу дакладная GPS-карта паказвае ў рэальным часе, дзе знаходзяцца розныя групы паляўнічых, паліцэйскіх і мясцовых службоўцаў. Гэта зніжае рызыку выпадкова стрэліць у чалавека падчас пераследу звера.
Але даследчык з Універсітэта Іватэ Кіёсі Ямаўці папярэджвае: мядзведзі вучацца. Калі прылада не стварае для іх рэальнай пагрозы, яны могуць прызвычаіцца да яе і перастаць рэагаваць.
«Важна не лічыць, што простае ўсталяванне новай тэхналогіі азначае, што праблема вырашаная», — падкрэслівае ён.
Хто такая Алеся Пархоменка з Кіпра, якая развязала беларуска-беларускую вайну88
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары
Бо папуляцыя мішак будзе ісці сюды з Расеі і далей.
Але, паколькі на Беларусі меньш бесперапынных масіваў лесу, адпаведна яны будуць усё часцей выходзіць да чалавека.