На мінскім вакзале затрыманыя пенсіянеры, якія збіраліся на інаўгурацыю Лукашэнкі
Група з 7 пенсіянераў на чале з праваабаронцам Тамарай Сяргей была затрыманая сёння раніцай на мінскім чыгуначным вакзале.
Як паведаміў карэспандэнту Свабоды супрацоўнік міліцыі Сяргей Гаркавы, Тамара Сяргей падазраецца ў крадзяжы грошай у адной з наведніц вакзала, якая засведчыла гэта.
Пенсіянеры з Мінска, Бабруйска і Крупак збіраліся трапіць да месца правядзення інаўгурацыі Аляксандра Лукашэнкі, каб там сустрэцца з ім. Усе затрыманыя — актывісты ініцыятывы «Супраць беззаконнасці ў судах».
Тамара Сяргей знаходзіцца ў міліцэйскім пастарунку, не адпускаюць і астатніх 6 чалавек з групы.
У дзяжурнай частцы міліцыі Чыгуначнага вакзала дзяжурны адмовіўся называцца і сказаў, што «Тамара Сяргей не затрыманая, але цяпер праводзіцца праверка, бо яна падобная на злачынцу, які ўчыніў злачынства». Якое менавіта - не сказаў.
Тым часам Тамара Сяргей паведаміла праз тэлефон, што падпалкоўнік Сяргей Гаркавы, які яе затрымліваў, прымяніў да яе грубую сілу. Зараз яна застаецца ў пастарунку і яе абшукваюць.
Каментары