У Віцебску грошы на помнік Аляксандру Неўскаму збіраюць з прадпрымальнікаў
Паперку з заклікам пералічыць не менш за 50 тысяч рублёў раздавалі на мясцовым рынку «Эвіком» прадстаўнікі падатковай.
Рашэнне ўсталяваць помнік Аляксандру Неўскаму прынялі яшчэ некалькі гадоў таму. Згодна з умовамі тэндару ён павінен быць выраблены, дастаўлены ў абласны цэнтр і змантаваны на ўжо існуючым пастаменце насупраць Благавешчанскай царквы на плошчы 1000-годдзя Віцебска да 1 мая 2016 года. Згодна з паданнем, вянчанне Аляксандра Неўскага з князёўнай Аляксандрай (Параскевай) праходзіла ў віцебскай Благавешчанскай царкве. Аднак гэта не пацвярджаецца ў летапісных крыніцах.
Скульптура сімвалізуе сустрэчу князя Аляксандра Неўскага з жонкай Аляксандрай (Параскевай) і сынам Васілём. Аляксандра была дачкой полацкага князя Брачыслава Васількавіча, які да смерці свайго бацькі займаў віцебскі пасад. Пасля смерці Брачыслава ў Віцебску жыла маці князёўны, якую Аляксандра часта наведвала. І менавіта ў Віцебск пасля бітвы пад горадам Усвяты ў 1245 годзе Аляксандр Неўскі прыехаў забраць жонку і сына. Гэты факт апісаны ў Наўгародскім летапісу. Варта адзначыць, што пад Усвятамі Аляксандр разбіў літоўскіх князёў на чале з Міндоўгам, якія дайшлі аж да Таржка, аднак былі вымушаныя адступіць.
Помнік будзе складацца з фігур самога Аляксандра Неўскага з сынам Васілём на руках і яго жонкі. Кошт — больш за 3 мільярды рублёў, ці каля 190 тысяч даляраў. Праўда, Пётр Падгурскі, намеснік старшыні віцебскага гарвыканкама, заяўляў, што на помнік пойдуць выключна пазабюджэтныя грошы, як гэта было з помнікам Альгерду.
Каментары