Суддзя Маскоўскага раёна Мінска Максім Сушко 30 снежня аштрафаваў студэнта Белдзяржуніверсітэта Глеба Вайкуля на 18 базавых велічынь (3,24 млн. рублёў) за ўдзел у несанкцыянаваным масавым мерапрыемстве — студэнцкім маршы, які прайшоў 2 снежня ў Мінску.
Маладога чалавека абвінавацілі ў парушэнні ўстаноўленага парадку пікетавання. Згодна з Кодэксам аб адміністрацыйных правапарушэннях, за гэта правапарушэнне прадугледжваецца пакаранне ў выглядзе папярэджання, або накладання штрафу ў памеры да 30 базавых велічынь, ці адміністрацыйнага арышту.
Вайкуль паведаміў БелаПАН, што плануе абскардзіць вердыкт у Мінскім гарадскім судзе.
«Гэта судзілішча над студэнтамі, якія спрабавалі абараняць свае правы, гэта пераслед за актыўную грамадзянскую пазіцыю і рэпрэсіі, якім няма канца», — сказаў Вайкуль.
Як паведамлялася раней, на наступны дзень пасля маршу студэнтаў Вайкуль атрымаў вуснае папярэджанне дэканата за пропускі заняткаў. Такое рашэнне на пасяджэнні прынялі члены нядаўна створанай ў ВНУ камісіі па пропусках заняткаў.
Каментары