Мэр Кёльна Генрыэта Рэкер склікала экстранную нараду з паліцыяй пасля паступлення паведамленняў аб тым, што напярэдадні Новага года ў горадзе было здзейснена каля 80 нападаў на жанчын.
Большасць з іх адбыліся блізу цэнтральнай чыгуначнай станцыі горада. Паводле папярэдніх дадзеных, у іх удзельнічалі каля тысячы агрэсіўна настроеных маладых мужчын.
Кіраўнік паліцыі Кёльна паведаміў, што большасць нападнікаў былі выхадцамі з арабскіх краін і з Паўночнай Афрыкі.
Як мінімум адна жанчына была згвалтаваная, многія былі абрабаваныя. Сярод пацярпелых ёсць і жанчыны-паліцэйскія.
Паліцыя спрабуе высветліць, ці была чарада нападаў арганізаваным і загадзя спланаваным актам. Таксама вывучаюцца запісы з камер назірання і мабільных тэлефонаў.
Як паведамляе мясцовае тэлебачанне, кёльнская паліцыя мае намер запытаць падмацаванне з іншых раёнаў Германіі і ўсталяваць дадатковыя камеры назірання ў горадзе.
Таксама паступаюць паведамленні пра напады на жанчын у Гамбургу і ў Штутгарце.
Каментары