Улады Ірана абвясцілі пра размарозку замежных актываў на суму каля 100 млрд даляраў, замарожаных у сувязі з узмацненнем жорсткасці міжнародных санкцый супраць краіны ў 2012 годзе.
Гаворка ідзе пра прыбытак ад нафтавых угод, які на працягу некалькіх гадоў назапашваўся на рахунках у кітайскіх, індыйскіх, японскіх і банках іншых краін.
«Гэтыя актывы цалкам размарожаныя, і мы можам імі карыстацца», — сказаў афіцыйны прадстаўнік урада Махамед Бакр Наўбахкт у інтэрв'ю мясцоваму тэлебачанню.
Як паведамляецца, рэпатрыяцыі фондаў перашкаджала адключэнне іранскіх банкаў ад сістэмы пераводаў SWIFT. У нядзелю Цэнтрабанк краіны абвясціў, што доступ банкаў да сістэмы адноўлены.
Іран пасля зняцця з яго міжнародных санкцый ужо заключыў некалькі буйных міжнародных угод. Падчас еўрапейскага турнэ прэзідэнта краіны ў Італіі былі падпісаныя кантракты на суму амаль 17 млрд даляраў, а ў Францыі — яшчэ на 25 млрд.
Каментары