У катэгорыі «Найлепшы дакументальны кароткаметражны фільм».
Ватыкан упершыню за 97‑гадовую гісторыю прэміі «Оскар» плануе падаць фільм на разгляд Амерыканскай акадэміі кінематаграфічных мастацтваў і навук, піша Variety.
«Зялёная лава» — дакументальны кароткаметражны фільм, створаны пры ўдзеле Ватыкана, у цэнтры якога малады італьянец Джакома, які жыве з мышачнай дыстрафіяй Дзюшэна.
Прэм’ера фільма адбудзецца на гэтым тыдні ў Лос-Анджэлесе — напярэдадні яго падачы на разгляд у катэгорыі «Найлепшы дакументальны кароткаметражны фільм».
«Зялёную лаву» пакажуць з 18 па 24 верасня ў Lumiere Music Hall у Беверлі-Хілз. Пасля кінапракату каманда стваральнікаў завершыць неабходныя фармальнасці для падачы фільма на разгляд «Оскара», паведаміў прадстаўнік карціны.
Такая падача стане першым выпадкам, калі фільм, створаны Ватыканам, будзе прэтэндаваць на прэмію Амерыканскай кінаакадэміі.
Рэжысёрамі фільма выступілі Лія Бельтрамі і Алі Аксу.
39‑хвілінны фільм, зняты на фоне захапляльных краявідаў Даламітаў, у рэкламных матэрыялах апісваецца як «шчымлівы роздум пра незалежнасць, чалавечы дух і пераўтваральную сілу супольнасці перад абліччам нягод».
Уручэнне прэміі «Оскар» пройдзе 14 сакавіка 2027 года.
15 снежня 2026 года будуць абвешчаныя шорт-лісты, а 21 студзеня — абвяшчэнне намінантаў.
Каментары