Сродкаў для вынасу прамысловых прадпрыемстваў з цэнтра за межы горада пакуль няма, заявіў 4 лютага на прэс-канферэнцыі старшыня Мінгарвыканкама Андрэй Шорац.
«Вы бачыце, якая эканамічная сітуацыя сёння. Мы некалькі разоў паспрабавалі вынесці абутковае ААТ «Прамень». На жаль, тых сродкаў, якія неабходныя для будаўніцтва новага аб'екта, няма. Яны не супастаўныя з тым, колькі можна атрымаць ад продажу старой пляцоўкі», — растлумачыў кіраўнік гарвыканкама.
Паводле слоў Шорца, «рынак нерухомасці стаіць», забудоўшчыкі не могуць рэалізаваць каля 8 тысяч новых кватэр. «Арганізацыя вытворчасці патрабуе шмат затрат. Будаўніцтва новых прадпрыемстваў у нас, на жаль, не вядзецца», — дадаў старшыня гарвыканкама.
«Але мы зацікаўленыя ў стварэнні рабочых месцаў, гатовыя разглядаць удзел бюджэту ў гэтым», — падкрэсліў Шорац. Ён паабяцаў падтрымку Мінгарвыканкама прадпрыемствам малога і сярэдняга бізнесу, якія ствараюць новыя працоўныя месцы. «За кошт сродкаў бюджэту мы гатовыя кампенсаваць частку працэнтных ставак па крэдытах, кампенсаваць частку сродкаў на стварэнне працоўных месцаў, частку сродкаў на выставачна-кірмашовую дзейнасць», — сказаў кіраўнік гарадской адміністрацыі.
«Мы зацікаўленыя ў развіцці малога і сярэдняга бізнесу і для таго, каб кампенсаваць не зусім добры стан нашай буйной прамысловасці: маторнага завода, трактарнага, МАЗа. Хочам, каб доля малога і сярэдняга бізнесу павялічваўся», — адзначыў Шорац. Ён паведаміў, што па выніках 2015 года доля малога і сярэдняга прадпрымальніцтва ў даходах бюджэту горада склала 33%. «Таму мы зацікаўленыя, каб гэты сектар развіваўся і папаўняў бюджэт», — падкрэсліў старшыня гарвыканкама.
Паводле яго слоў, прыватны бізнэс пакуль «не мае фінансавых магчымасцяў і нейкага цікавасці ва ўдзеле ў будаўніцтве сацыяльных аб'ектаў» горада. Так, напрыклад, у снежні мінулага года гораду быў перададзены дзіцячы сад, пабудаваны славенскім інвестарам. Адзін з беларускіх інвестараў цікавіўся ім на прадмет адкрыцця там прыватнай школы, але на мінулым тыдні Мінгарвыканкам атрымаў ад яго адмову, паведаміў Шорац.
Былі таксама намеры прыцягваць сродкі інвестараў для будаўніцтва басейнаў, аднак пакуль прапануюцца занадта дарагія праекты. «Прыватныя спартыўныя цэнтры ў нас будуюцца, але не ў вялікай колькасці. Я спадзяюся, што мы пераадолеем нялёгкі час, і прыватны бізнэс прыйдзе і ў будаўніцтва сацыяльна-культурных аб'ектаў», — заявіў кіраўнік Мінгарвыканкама.
Былога супрацоўніка контрразведкі КДБ арыштавалі за здраду дзяржаве9
Каментары