Гісторыя пад спайсам: гомельскіх студэнтаў выкралі невядомыя ў масках
У той вечар жыхары гомельскай шматпавярхоўкі выклікалі міліцыю. Прычынай іх турботы сталі падлеткі, якія вельмі моцна шумелі ў пад'ездзе.
Калі праваахоўнікі прыехалі, на лесвічнай пляцоўцы апошняга паверха ляжалі двое збітых хлопцаў. Побач валяліся наркотыкі. Але хлопцы запэўнівалі, што тут ні пры чым і наогул яны пацярпелыя. Нібыта іх выкралі невядомыя ў масках. Павезлі на чорным джыпе ад будынка ўніверсітэта, прывезлі ў незнаёмы пад'езд, збілі, а потым падкінулі наркотыкі.
Студэнты-другакурснікі настойліва прытрымліваліся ўласнай версіі, але пасля следчага эксперыменту прызналіся. Аказалася, што ў пад'езд шматпавярхоўкі яны забрылі, каб ужыць спайс. Праз дамафон дзверы адкрылі самі жыхары. Хлопцы падняліся на апошні паверх. Дзверы на тэхпаверх былі не зачынены, і студэнты ўладкаваліся на лесвічнай пляцоўцы. Адурманеныя, яны сталі гучна смяяцца, уставалі на ногі і падалі, біліся аб сцены. Адсюль і сінякі на іх целах і тварах.
Як распавёў старэйшы следчы 1-га следчага аддзялення Гомельскага гарадскога аддзела Следчага камітэта Святаслаў Літвінаў, крымінальная справа перададзена ў суд. Аднаго студэнта абвінавачваюць у захоўванні наркотыкаў, другога за ўжыванне спайсаў прыцягнуць да адміністрацыйнай адказнасці.
Каментары