Самая разумная карова ў свеце жыве ў Аўстрыі.
Яна ўмее выкарыстоўваць доўгую шчотку як шматфункцыянальны інструмент! Адзін канец чэша ёй спіну, другі — іншыя часткі цела.
Як піша iflscience.com, карова выкарыстоўвае розныя прыстасаванні, каб пачасаць цяжкадаступныя месцы на спіне і баках. У яе арсенале — мятла, граблі, простыя доўгія палкі.
Уладальнік каровы, фермер і пекар Вітгар Вігеле, кажа, што яна адразу ж выкарыстоўвае інструмент, калі бачыць яго.
Паводле яго слоў, яна пачала рабіць гэта ва ўзросце трох гадоў. А цяпер карове ўжо 13 гадоў, і яна добра авалодала тэхнікай: заціскаючы палку ў сківіцах, яна можа доўгімі інструментамі пачасаць амаль кожную частку свайго цела.
Пры гэтым Вероніка адрознівае канец мятлы з шчаціннем і без яго і выкарыстоўвае іх у залежнасці ад патрэбы. Такім чынам, яна можа далікатна дакранацца да адчувальных участкаў.
«Гэта робіць інструмент шматфункцыянальным, чаго раней дасягалі толькі шымпанзэ, якія выкарыстоўвалі травінкі для палявання на тэрмітаў», — адзначылі даследчыкі з Венскага ўніверсітэта ветэрынарнай медыцыны, якія некаторы час назіралі за каровай.
Гэта першае навуковае даследаванне выкарыстання прылад працы каровамі. Аднак існуюць відэа, якія паказваюць іншых кароў і быкоў, што робяць падобныя рэчы.
У даследаванні, апублікаваным у часопісе Current Biology пасля назіранняў за Веронікай, навукоўцы адзначаюць, што здольнасць развіваць такія паводзіны закладзена ў прыродзе гэтых жывёл. Хоць яны і падкрэсліваюць, што некалькі выпадкаў выкарыстання прылад працы асобнымі асобінамі не робяць увесь від у цэлым «карыстальнікамі прылад працы».
«Бульба» з Оршы пайшоў ваяваць за Расію — цяпер сястра шукае яго ці хаця б яго парэшткі9
Каментары