На афіцыйнай цырымоніі падпісання Парыжскага пагаднення ў Нью-Ёрку амерыканскі акцёр Леанарда Дзі Капрыа заявіў, што няма ніякіх падстаў сумнявацца ў высновах навукоўцаў пра тое, што змяненне клімату — вынік дзейнасці чалавека. Пра гэта паведамляе Цэнтр навін ААН.
«У якасці пасланца міру ў апошнія два гады я падарожнічаў па ўсім свеце і збіраў сведчанні таго, як крызісы мяняюць прыродны баланс на нашай планеце. Я бачыў такія гарады, як Пекін, які задыхаецца ад прамысловага забруджвання», — сказаў Леанарда Дзі Капрыа. Ён прыцягнуў увагу да знішчэння лясоў у Канадзе і Інданезіі, да паводак у Індыі і Маямі. «У Грэнландыі і ў Арктыцы я быў уражаны хуткімі тэмпамі раставання старажытных ледавікоў. Усё гэта я бачыў на свае вочы. І ўсё гэта прывяло мяне ў жах», — прызнаўся знакаміты акцёр.
Леанарда Дзі Капрыа заклікаў міжнародную супольнасць у імя сваіх дзяцей і будучых пакаленняў спыніць дэградацыю навакольнага асяроддзя. Ён дадаў, што для гэтага неабходная толькі палітычная воля. Амерыканскі акцёр заклікаў адмовіцца ад празмернага выкарыстання выкапнёвага паліва і перайсці да аднаўляльных крыніц энергіі.
Сёння ў штаб-кватэры ААН Генеральны сакратар ААН Пан Гі Мун абвясціў аб адкрыцці да падпісання Парыжскага пагаднення. Ён назваў гэтую падзею гістарычнай — урады 171 краіны паведамілі пра гатоўнасць паставіць свае подпісы пад Парыжскім пагадненнем. Ніколі раней так шмат краін не падпісвалі якое-небудзь міжнароднае пагадненне ў адзін дзень.
Пагадненне па клімаце было прынята ў снежні 2015 года на 21-й Канферэнцыі краін — удзельніц Рамачнай канвенцыі ААН па пытаннях змены клімату. Яно вызначае нормы выкідаў парніковых газаў пасля 2020 года і меры па прадухіленні змянення клімату. Пагадненне заклікана пракласці шлях да экалагічна ўстойлівай будучыні. У ім утрымліваецца абяцанне ўтрымаць павышэнне глабальнай тэмпературы на ўзроўні 1,5 градусаў Цэльсія.
Парыжскае пагадненне па клімаце набудзе моц на 30-ы дзень пасля таго, як яго ратыфікуюць не менш за 55 краін, на якія ў сукупнасці прыпадае як мінімум 55% агульных выкідаў парніковых газаў.
Пагадненне будзе заставацца адкрытым для падпісання ў Цэнтральных установах Арганізацыі Аб'яднаных Нацый у Нью-Ёрку да 21 красавіка 2017 года.
Цяпер чытаюць
35 маладых беларусаў і беларусак, за якімі варта сачыць: апублікаваны першы спіс Next 3524
Каментары