6 мая стала вядома пра выкананне смяротнага прысуду ў дачыненні да жыхара Рэчыцы Сяргея Іванова. У сакавіку 2015 года ён прызнаны вінаватым у жорсткім забойстве знаёмай дзяўчыны і прыгавораны да расстрэлу.
Каардынатар кампаніі «Праваабаронцы супраць смяротнага пакарання» Андрэй Палуда паведаміў БелаПАН, што Іванова вывелі з камеры СІЗА № 1 Мінска ў ноч з 17 на 18 красавіка. Пра тое, што смяротны прысуд прыведзены ў выкананне, сваякам паведамілі пасля 1 мая.
«Найбліжэйшым часам яны павінны забраць пасведчанне аб смерці. Асабістыя рэчы асуджанага пакуль не вярнулі», — адзначыў праваабаронца.
Згодна з беларускім заканадаўствам, сваякам не выдаюць цела асуджанага, а таксама не паведамляюць пра месца яго пахавання.
Вядома, што Іваноў звяртаўся з прашэннем аб памілаванні на імя Аляксандра Лукашэнкі і накіроўваў скаргу ў Камітэт па правах чалавека ААН. Адказ з міжнароднай структуры пакуль не паступаў. Нягледзячы на гэта, прысуд прыведзены ў выкананне.
Зараз у «калідоры смерці» у СІЗА № 1 знаходзяцца тры чалавекі, прыгавораныя да выключнай меры пакарання: Іван Кулеш (жорсткае забойства трох чалавек), Генадзь Якавіцкі (жорсткае забойства аднаго чалавека), Сяргей Хмялеўскі (жорсткае забойства трох чалавек).
Беларусь застаецца адзінай краінай у Еўропе і на ўсёй постсавецкай прасторы, дзе да гэтага часу ўжываецца смяротнае пакаранне. З 1991 года да расстрэлу прыгаворана больш за 400 чалавек, Лукашэнка памілаваў толькі аднаго асуджанага.
Цяпер чытаюць
Сталі вядомыя падрабязнасці пра трагедыю ў Полацкім манастыры16
Сталі вядомыя падрабязнасці пра трагедыю ў Полацкім манастыры
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары