Калі Брытанія выйдзе з ЕС, як гэта паўплывае на Беларусь
Да рэферэндуму пра лёс Брытаніі ў ЕС засталося 2 дні. Проста цяпер на стадыёне Уэмблі праходзяць гіганцкія дэбаты, каб трапіць на якія брытанцы з васьмі раніцы займалі чаргу.
Папярэдні тыдзень прайшоў у паніцы: фунт імкліва падаў; 2,5 мільёны брытанцаў, што працуюць у ЕС, падрыхтаваліся развітвацца «з Еўропай»; палітыкі пачалі выкарыстоўваць апошнія, раней, здавалася б, забароненыя аргументы. Дайшло нават да палітычнага забойства: дэпутатку парламента зарэзалі, фактычна, на вачах усяго горада. Забойства адразу ж звязалі з рэферэндумам пра выхад з ЕС.
У Беларусі ж гэтыя падзеі, здаецца, амаль не абмяркоўваюць. Між тым, ужо цяпер ясна, што любы вынік рэферэндума будзе звышуплывовым для нас.
Вось 5 наступстваў выхаду з ЕС для Беларусі, якія лягчэй за ўсё прадбачыць.
Калі Брытанія выйдзе з ЕС, то:
1. У эканоміцы Беларусі пачнуцца яшчэ большыя праблемы. Большасць каментатараў пагаджаецца, што выхад з ЕС пацягне за сабой фінансавы спад у Брытаніі, ЕС, і, магчыма, па ўсім свеце. А можа нават абвал як мінінмум брытанскай эканомікі. Сёння Джордж Сорас сказаў проста: калі Брытанія выходзіць з ЕС, на наступны дзень фунт і еўра аб'яднаюцца ў вельмі непрыемным дуэце — вольным падзенні на дно эканамічнага крызісу, рэгуляваць які будзе вельмі цяжка.
2. Беларускі рубель можа яшчэ мацней абваліцца. Як наступства папярэдняга пункта.
3. Беларусы могуць зазнаць дадатковыя цяжкасці ў вандроўках. Цяпер дэбаты пра выхад з ЕС канцэнтруюцца на адным пытанні: як спыніць міграцыю ў Брытанію. І міграцыю непазбежна і памылкова асацыююць з візавым рэжымам. Верагодна, на некаторы час ЕС стане яшчэ менш схільным адкрываць свае межы хоць каму.
4. Беларусі стане цяжэй дамовіцца пра спрашчэнне і лібералізацыю візавага рэжыму з ЕС. І ці будзе з кім дамаўляцца ўвогуле? Наступнай на выхад з ЕС пасля Брытаніі называюць Данію. Ці пацягне гэта далейшую рэакцыю і распад ЕС? Наўрад ці нехта можа цяпер гэта прадказаць.
5. Слабейшы ЕС значыць менш абароненую Беларусь. Не трэба быць вялікім знаўцам міжнародных адносінаў, каб пагадзіцца з тым, што аслабленне аднаго полюсу — заходняга — узмоцніць іншы полюс на ўсходзе. Больш «суверэнная» Брытанія дакладна не зробіць Беларусь больш незалежнай.
Каментары