Не паспеў яшчэ скончыцца сёлетні Еўра, як беларускія каманды ўзялі старт у еўракубках сезону 2016/2017.
Пачынаюць нашы каманды з самых нізоў. У першым кваліфікацыйным раўндзе мінскае «Дынама» прымала на стадыёне «Трактар» юрмальскі «Спартак».
Прыгожая шыльда для людзей, якія яшчэ сумуюць па савецкім футболе: «Дынама» – «Спартак». Латвійская каманда, хоць і маладая (заснаваная ў 2007 годзе), але вельмі баявітая. Яе ўзначальвае беларускі спецыяліст Алег Кубараў, а ў складзе клуба значыліся сёння трое беларусаў: Дзмітрый Платонаў, Сяргей Казека, Сяргей Пушнякоў.
Пра тое, што гульня для мінчукоў не магла быць лёгкай, гаворыць хоць бы той факт, што беларускія каманды пакуль толькі аднойчы з пяці спробаў перамагалі латвійскія. Усім помніцца, як БАТЭ некалі сенсацыйна саступіў «Вентспілсу» ў Лізе чэмпіёнаў. «Спартак» (Юрмала) – гэта лідар сёлетняга першынства Латвіі.
У «Дынама» ж істотныя праблемы са складам. У расійскі «Арэнбург» з’ехаў брамнік Аляксандр Гутар, 30 чэрвеня быў апошні дзень кантракта серба Ненада Адамавіч, траўмаваны цэнтральны абаронца Умару Бангура.
Хоць букмекеры і верылі ў беларусаў, але на справе ўсё магло скончыцца вельмі па-рознаму.
«Дынама» пачало гульню са сваіх атак, «Спартак» граматна абараняўся. Мабыць, надзейнасць уласных тылоў – гэта асноўнае, пра што казаў Алег Кубараў сваім хлопцам.
Гол атрымаўся дастаткова раптоўным. Юрый Астравух вельмі добра закінуў мяч у штрафную, а там Арцём Быкаў галавой прабіў у тую кропку варот, куды брамнік дацягнуцца не мог ніяк – 1:0.
Пасля гэтага гульня супакоілася. Яна нават закалыхвала гледачоў. «Спартак» не ішоў наперад, а ў «Дынама» нічога не атрымлівалася.
Другі тайм стартаваў з атак юрмальскага клуба. Момантамі «Дынама» гуляла на адбой. Пару разоў добра згуляў малады брамнік Ігнатовіч. Адчувалася, калі справы так пойдуць далей, то «Спартак» адыграецца. На жаль, так і адбылося.
Гэта Інвус Шлампе абкраў на фланзе абаронцу «Дынама» Аляксандра Наёка і выкаціў мяч пад удар Данііла Улімбашава – 1:1. Абаронца «Дынама» не меў права так памыляцца ў тым эпізодзе.
І ўсё ж «Дынама» прадэманстравала сапраўдны байцоўскі дух. Не прайшло і двух хвілін ад моманту гола Улімбашава, як Арцём Быкаў у другі раз за вечар прымусіў латвійцаў капітуляваць. Ён скарыстаўся памылкай брамніка «Спартака», які выбіў мяч акурат на нагу беларусу – 2:1.
Болей галоў не было. Гульня ў адказ пройдзе 7 ліпеня ў Латвіі. Лёгка нашым дакладна не будзе.
Другі наш прадстаўнік у Лізе Еўропы салігорскі «Шахцёр» у гасцях перамог фарэрскі «Рунавік» – 2:0. Абодва галы з пенальці забіў украінскі легіянер Арцём Старгародскі.
Гульня ў адказ 7 ліпеня ў Салігорску. Пачатак а 21:00.
Цяпер чытаюць
Каардынатара пошукавага атрада «Анёл» пасадзілі за палітыку2
Каментары