На парламенцкіх выбарах па Полацкай гарадской акрузе №27 пераабіраецца Наталля Гуйвік, колішняя суддзя Полацка.
Яна звяртае на сябе ўвагу дзякуючы сваёй дэкларацыі аб даходах. Летась Гуйвік атрымала 289 мільёнаў рублёў — гэта штомесяц па 24 мільёны ($1516). Прыкладна такая ж сума і ў іншых дэпутатаў.
Але Гуйвік атрымала па «дамове дарэння ад фізічнай асобы» яшчэ ажно 307,91 мільёна рублёў. Гэта каля $20 тысяч.
Сярод маёмасці ў яе застаецца кватэра ў Полацку (56,4 м2), легкавік «Мазда 3» 2012 года выпуску і акцыі «Мастоўдрэва».
* * *
Наталля Гуйвік нарадзілася ў 1962 годзе ў горадзе Кіраў (Расія). Скончыла Усесаюзны юрыдычны завочны інстытут.
Працавала юрысконсультам у Полацкім вытворчым лесанарыхтоўчым аб'яднанні, юрысконсультам вайсковай часці, суддзёй суда Полацкага раёна і Полацка, з'яўлялася старшынёй Полацкага гарадскога Савета дэпутатаў.
Абранне Гуйвік у палату прадстаўнікоў у 2012 годзе суправаджалася скандалам. Датэрмінова і на месцы жыхарства нібыта прагаласавала больш за 50% (!) удзельнікаў выбараў.
Сям'я Гуйвік — муж Міхаіл і дачка Вольга Аляксандраўна. Муж па адукацыі фізік-педагог і ў дадатак падпалкоўнік міліцыі ў адстаўцы. А дачка, па словах, дэпутаткі, працавала спецыялісткай па рэкламе на радыё «Юністар».
Каментары