Праз два месяцы пасля навіны пра развод з мужам Жазэ Нуньесам, раман з якім апісаны ў бестсэлеры «Есці, маліцца, кахаць», пісьменніца Элізабэт Гілберт зрабіла яшчэ больш нечаканую заяву: яна закаханая ў сваю даўнюю сяброўку, амерыканскую пісьменніцу сірыйскага паходжання Раю Эліяс, і цяпер яны партнёркі. Пра гэта Гілберт напісала на сваёй старонцы ў фэйсбуку.
«Мы з Райей цяпер разам. Я кахаю яе, а яна кахае мяне», — піша Гілберт. Яна таксама пацвярджае, што менавіта пачуцці да сяброўкі, якую яна заўсёды лічыла сваёй «ролевай мадэллю» і «чалавекам, якому давярае больш за ўсё», сталі прычынай разводу з Жазэ. Гілберт тлумачыць, што ўсвядоміла сваю закаханасць пасля таго, як увесну Раі дыягнаставалі рак падстраўнікавай залозы і печані.
«Нешта здарылася з маім сэрцам і розумам пасля таго, як мы даведаліся дыягназ Раі, — працягвае Гілберт. — Смерць ці перспектыва смерці робіць няважным усё, што з'яўляецца несапраўдным, і ў гэтай прасторы рэзкай і поўнай рэалістычнасці я сутыкнулася з ісцінай: я не проста люблю Раю, я закаханая ў Раю. І ў мяне больш няма часу на адмаўленне гэтай ісціны».
Па словах Элізабэт, яны з Раяй вырашылі расказаць пра свой раман, бо «ісціна і празрыстасць» палегчаць іх сумеснае жыццё.
Элізабэт Гілберт сустрэла свайго былога мужа Жазэ Нуньеса падчас падарожжа на Балі, дзе яна шукала сябе пасля краху свайго першага шлюбу. Менавіта сустрэча з Жазэ шмат гадоў таму стала для Элізабэт адпраўным пунктам да асабістага шчасця, а першы этап адносін з ім быў падрабязна апісаны ў трэцяй частцы рамана, выдадзенага ў 2006 годзе накладам больш за 10 мільёнаў копій. Элізабэт і Жазэ пабраліся шлюбам у 2007 годзе. Да гэтага з 1994 па 2002 год пісьменніца была замужам за Майклам Куперам.
-
Вандроўнік і бізнэсовец з Мінска за два дні знайшоў сабе праз сацсеткі нявесту — найбольш спадабалася дзяўчына з Расіі
-
«Дзяўчаты, гэта рэальна працуе!» Нявеста Пратасевіча расказала, як прываражыла будучага мужа чырвонымі трусамі
-
Яноціха Ясенія, якая нелегальна прыехала з ЗША, знайшла мужа ў Баранавічах
Памятаеце былога памежніка, які стаў дальнабойшчыкам і ў Германіі прызнаваўся ў любові да Лукашэнкі? З ім бяда11
Каментары