Шэф беларускай місіі на Паралімпіядзе ў Рыа Мікалай Шудзейка распавёў, што нашы спартоўцы абураныя учынкам прыстаўленага да дэлегацыі чыноўніка Андрэя Фомачкіна, які выйшаў на цырымонію адкрыцця з расійскім сцягам.
«Каманда мае намер дыстанцыявацца ад Фомачкіна. Мне здаецца, што некаторыя колы ў нашай краіне спрабуюць выкарыстоўваць нашу каманду ў якасці інструмента для дасягнення нейкіх палітычных мэтаў. Мы ўсе вельмі абураныя такімі крокамі. Пахвалы на адрас Фомачкіна з боку расейскага ўрада вельмі нас хвалююць.
Пасля цырымоніі я запатрабаваў ад Фомачкіна тлумачэнняў. Ён сказаў мне, што ён расеец па паходжанні — Фомачкін нарадзіўся і доўгі час жыў у Расіі — і хацеў бы выказаць падтрымку расійскім паралімпійцам, якіх не пусцілі ў Рыа.
Я паняцця не меў, што гэты чалавек збіраецца распачаць такія дзеянні. Я быў узрушаны, убачыўшы ў яго руках расійскі сцяг падчас цырымоніі. Я папрасіў Фомачкіна прыбраць сцяг, ён зрабіў гэта толькі з другога разу.
Фомачкін быў акрэдытаваны ў якасці госця прэзідэнта НПК Беларусі Алега Шэпеля, Фомачкін не быў членам нашай дэлегацыі і вырашыў узяць удзел у цырымоніі адкрыцця ў самы апошні момант.
Усе беларускія спартоўцы і службовыя асобы шкадуюць пра гэты выпадак. Яны не хочуць быць ўцягнутыя ў парушэнне правілаў спаборніцтваў. Усе яны асудзілі дзеянні Фомачкіна. Гэта мая віна, што я не змог прадухіліць гэты інцыдэнт.
Перад цырымоніяй я праінструктаваў ўсіх членаў дэлегацыі, распавёў, што палітычныя сімвалы і лозунгі забароненыя. Усе спартоўцы строга выконвалі гэтыя правілы», — сказаў Шудзейка у інтэрв'ю The Guardian.
Каментары