Праваахоўнікі затрымалі мінчука па падазрэнні ў здзяйсненні хуліганскіх дзеянняў — ён пашкодзіў нажом прыпаркаваны аўтамабіль, паведаміла прэс-афіцэр Цэнтральнага РУУС Таццяна Абозная.
«Уладальнік аўтамабіля незадоўга да здарэння прыехаў да хаты і пакінуў аўто на паркоўцы. Да яго звярнуўся мужчына, жадаючы завесці размову, аднак гаспадар машыны адмовіўся размаўляць, спасылаючыся на тое, што спяшаецца. Знаходзячыся ў кватэры, ён убачыў праз акно, што каля яго машыны знаходзіцца мужчына, які спрабаваў загаварыць з ім, і наносіць удары нажом па колах. Аўтаўладальнік тут жа выклікаў міліцыю», — распавяла Таццяна Абозная.
Як высветлілася, 36-гадовы мінчанін такім спосабам вырашыў спагнаць сваю крыўду за адмову ўладальніка размаўляць з ім — спачатку парэзаў два колы, пасля чаго стукнуў нагой па бакавым шкле.
Распачатая крымінальная справа па ч.1 арт.339 КК Беларусі, максімальнае пакаранне якой прадугледжвае пазбаўленне волі на тэрмін да 3 гадоў.
Каментары