Зборная Турцыі ў надзвычай драматычным матчы атрымала валявую перамогу над зборнай Чэхіі (3:2) і выйшла ў чвэрцьфінал чэмпіянату Эўропы.
І гэта пры тым, што да 75-й хвіліне падапечныя Фаціха Тэрыма гарэлі зь лікам 0:2. На 34-й хвіліне першы гол у матчы забіў Ян Колер.
На другі тайм турэцкія футбалісты выйшлі з жаданьнем адыграцца і зрабілі дзеля гэтага некалькі набегаў на славян, ну проста як іх прадзеды колькі стагодзьдзяў таму.
На 61-й хвіліне чэхі, як ім здавалася, паставілі кропку ў гульні. Гол на рахунку Яраслава Плашыла.
Але туркі пад акампанэмэнт моцнага дажджу толькі пачасьцілі атакі на вароты Пэтэра Чэха. На 76-й хвіліне Арда Туран размачыў лік у гульні, а праз дзесяць хвілін сапраўдным героем матчу стаў форвард "Вільярэалу" Ніхат Кахвэджы.
На 87-й хвіліне П. Чэх пасьля навесу ў штрафную выпусьціў мяч з рук, і Ніхат зрэагаваў на дабіваньні. А яшчэ праз хвіліну ён жа прыгожым з вугла штрафной паслаў мяч пад бэльку чэскіх варот – 3:2.
На другой дададзенай хвіліне за грубую гульню ў сваёй штрафной быў выдалены з поля галкіпэр Валкан Дэмірэль, і паколькі ўсе замены былі выкарыстаныя, месца ў варотах заняў палявы гулец – Тунджай Шанлі. Але чэхі ня здолелі нават правесьці талковую атаку
Турцыя ў чвэрцьфінале.
У другім сёньняшнім матчы швайцарцы ў паядынку, што ўжо нічога ня значыў, перамаглі партугальцаў 2:0.
Цікава, што і тут бяз турак не абышлося. Два галы на рахунку гульца гаспадароў турэцкага паходжаньня Хакана Якіна.
Выніковае становішча: Партугалія – 6, Турцыя – 6, Чэхія – 3, Швайцарыя – 3.
Такім чынам ў пятніцу ў другім чвэрцьфінале зборная Турцыі згуляе са зборнай Харватыі, якая ў сваёй групе заняла першае месца.
Хто ж стане супернікам зборнай Партугаліі, вызначыцца ўжо сёньня, ў панядзелак, калі будуць згуляныя матчы ў групе "В" (Харватыя – 6, Нямеччына – 3, Аўстрыя і Польшча – па 1):
Харватыя – Польшча, Нямеччына – Аўстрыя. Пачатак а 21:45.
Працэнтаў на 90, што ў наступны раўнд трапяць немцы, але ж здараюцца і цуды ў жыцьці, як сёньня, калі туркі за 15 хвілін забілі тры мячы.
Цяпер чытаюць
«Кіберпартызанаў» крытыкуюць за ўзлом сайта Нацбібліятэкі — бо цяпер не працуе каталог. Тыя адказалі22
Каментары