Расійскія следчыя органы выставілі абвінавачанне ў шпіянажы ўкраінскаму журналісту Раману Сушчанку, затрыманаму ў Маскве ў канцы верасня. Па словах адваката затрыманага Марка Фейгіна, яго кліент пакуль адмовіўся даваць паказанні.
Адвакат растлумачыў, што такое рашэнне Сушчанка прыняў з-за таго, што не паспеў узгадніць з ім сваю пазіцыю. Пры гэтым чакаецца, што пасля сустрэчы з адвакатам украінец усё ж дасць паказанні ў пісьмовай форме.
Усяго, па словах Фейгіна, у абвінаваўчым заключэнні пералічаныя некалькі эпізодаў. У падрабязнасці адвакат удавацца не стаў, сказаўшы толькі, што ўсе яны здаюцца яму беспадстаўнымі. «Журналіст не з'яўляецца шпіёнам, гэта нонсэнс», — заявіў адвакат.
Сушчанку затрымалі ў Маскве ў канцы верасня, аднак у СМІ інфармацыя пра яго затрыманне з'явілася толькі 3 кастрычніка. Па словах члена маскоўскай Грамадскай назіральнай камісіі Зоі Светавай, яна выпадкова ўбачыла яго пры наведванні следчага ізалятара «Лефортава».
У той жа дзень затрыманне Сушчанкі пацвердзіла ФСБ. У ведамстве лічаць, што ў Расіі ён «збіраў звесткі аб дзейнасці Узброеных Сіл і войскаў Нацыянальнай гвардыі Расійскай Федэрацыі, якія ўяўляюць з сябе дзяржаўную таямніцу».
Сам Сушчанка віну не прызнае і зазначае, што працуе карэспандэнтам украінскага інфармагенцтва «Укрінфарм». Там пацвердзілі, што Сушчанка працуе ў іх з 2002 года, прычым апошнія шэсць гадоў — уласным карэспандэнтам у Францыі, а ў Маскву ён прыехаў у адпачынак.
Украінскі бок заяўляў, што Расія адмаўляецца пусціць да Сушчанкі яе консула. У сувязі з гэтым ужо расійскі консул у Кіеве быў выкліканы 6 кастрычніка ва ўкраінскі МЗС, але не з'явіўся.
Каментары