На месцы начнога здарэньня ў Менску знойдзена яшчэ адна — неразарваная — самаробная выбуховая прылада
На месцы начнога здарэння ў Мінску знойдзена яшчэ адна — неразарваная — самаробная выбуховая прылада, паведамілі БелаПАН ва ўпраўленні інфармацыі і грамадскіх сувязей МУС.
Як сказаў 4 ліпеня на аператыўнай нарадзе міністр унутраных спраў Уладзімір Навумаў, цяпер праводзіцца экспертыза дзвюх знойдзеных выбуховых прылад і асколкаў. Міністр разлічвае, што знаходка можа паўплываць на хуткасць расследавання.
Паводле звестак МУС, пасля выбуху ў бальніцы горада былі дастаўлены прыкладна 50 чалавек, у тым ліку тры — у цяжкім стане; прыблізна 10 чалавек пасля аказання першай дапамогі былі адпушчаны дамоў.
У.Навумаў выказаў упэўненасць у тым, што грамадскі парадак падчас астатніх святочных мерапрыемстваў будзе забяспечаны. Змен у праграме святкаванняў не будзе.
Міліцыя звярнулася да грамадзян, якія знаходзіліся на месцы здарэння і здымалі тое, што адбывалася, з просьбай аб садзеянні праваахоўным органам у вышуку злачынцаў.
Выбух, нагадаем, адбыўся на скрыжаванні праспектаў Машэрава і Пераможцаў прыблізна а першай гадзіне падчас святочнага канцэрта з нагоды Дня незалежнасці. Канцэрт наведала прыкладна паўмільёна чалавек. На месцы здарэння адразу пасля выбуду пабываў прэзідэнт Аляксандр Лукашэнка, які ў гэты час знаходзіўся на канцэрце, а таксама міністр унутраных спраў Уладзімір Навумаў і начальнік ГУУС Мінгарвыканкама Анатоль Куляшоў. Нягледзячы на надзвычайнае здарэнне, канцэрт працягваўся.
Па факце выбуху распачата справа на падставе артыкула 339 Крымінальнага кодэкса (хуліганства).
Цяпер чытаюць
Зяленскі назваў, якія рэтранслятары на мяжы і беларускія прадпрыемствы хвалююць Украіну40
Каментары