Сатырычны кліп «Хатнія гаспадыні ІДзІЛ» выклікаў спрэчкі ў Брытаніі ВІДЭА
Кліп брытанскай дзяржаўнай тэлерадыёкампаніі BBC «Хатнія гаспадыні ІДзІЛ» выклікаў спрэчкі ў благасферы і прэсе, бо ў ім жартуюць з жанчын, якія паехалі ў ісламісцкі халіфат. Пра гэта піша Independent.
На відэа дзве жанчыны прымераюць камізэлькі з бомбамі, трэцяя лічыць усіх сваіх забітых мужоў-смяротнікаў, а чацвёртая кажа: «Праз тры тыдні публічнае адсячэнне галавы, а я не ведаю, што мне апрануць!». Яшчэ адна гераіня распавядае: «Алі набыў мне новы ланцуг — 8 футаў. Цяпер я магу выходзіць на вуліцу!».
Крытыкі лічаць, што смяяцца з жанчын, якіх праз інтэрнэт завабліваюць ісламісты, няправільна. Іншыя кажуць, што гэта прыхаваная форма расізму: «Гэта смешна, толькі калі вы белы і хрысціянін».
Карыстальнікі сацыяльных медыя пішуць, што сама мэта сатыры ў дадзеным выпадку — паказаць маладым жанчынам-мусульманкам, як недарэчна выглядае захапленне «ІДзІЛам».
Сцэнарысты роліка Хейдан Проуз і Джоліен Рубінштэйн заявілі, што іх відэа скіравана на змаганне з экстрэмізмам.
«Трэба быць смелым, калі вы хочаце, каб вам верылі. Мы пяць гадоў смяяліся з Дэвіда Кэмерана, таму мы не маглі не заняцца «Ісламскай дзяржавай», — сказаў Проуз.
Каментары