Ліст Мінінфа «Нашай Ніве»: «Педагогі з задавальненнем набылі даступныя для іх білеты на канцэрт Дзмітрыя Харацьяна»

Рэдакцыя «Нашай Нівы» атрымала ліст ад Міністэрства інфармацыі. У ім міністр Лілія Ананіч спасылаецца на калектыўны зварот маладзечанскіх настаўнікаў. Яны абвяргаюць звесткі, выкладзеныя ў допісе нашай чытачкі.

Вольга Залеская сцвярджала, што настаўнікаў Маладзечна прымусова заганялі на творчы выступ расійскага артыста Дзмітрыя Харацьяна:

«Настаўнікі горада і раёна вымушаны былі запоўніць залу палаца і такім чынам даць зарабіць артысту. Усё яно нічога, каб добраахвотна ішлі людзі на вечар. Настаўнікі былі вымушаныя ісці. А запоўніць залу такім чынам вырашылі кіраўніцтва палаца і аддзел адукацыі. А як жа інакш, добры спосаб аплачваць гастролі расейскіх артыстаў».

З Маладзечна ж у Мінінфа паведамілі, што маладзечанскія настаўнікі ж запэўнілі, што пайшлі на творчы выступ добраахвотна: «Педагогі разам з сябрамі, сем'ямі з задавальненнем набылі даступныя для іх білеты на канцэрт Народнага артыста РФ Дзмітрыя Харацьяна».

Са свайго боку, мы не маем падстаў не давяраць нашай чытачцы, якой білет дастаўся «добраахвотна-прымусова».

Дадамо, што ва ўмовах эканамічнага крызісу добраахвотна-прымусовы ўдзел бюджэтнікаў у гастролях замежных артыстаў — гэта яшчэ і вымыванне валюты з краіны, ад чаго неаднаразова засцерагала кіраўніцтва краіны.

Падаём тут поўны тэкст ліста Міністэрства інфармацыі.

* * *

Пра распаўсюд інфармацыі

2 лютага 2017 года на інфармацыйным рэсурсе nn.by быў апублікаваны артыкул «Не вешать нос, гардемарины!» Настаўнікі Маладзечна падтрымалі матэрыяльна артыста Харацьяна», у якім змяшчаецца наступная інфармацыя:»… Настаўнікі горада і раёна вымушаныя былі запоўніць залу палаца і такім чынам даць зарабіць артысту. Усе яно нічога, калі б добраахвотна ішлі людзі на вечар. Настаўнікі былі вымушаныя ісці. А запоўніць залу такім чынам вырашыла кіраўніцтва палаца і аддзел адукацыі».

У адпаведнасці з калектыўным зваротам выкладчыкаў арганізацый адукацыі г. Маладзечна, які паступіў на адрас Міністэрства інфармацыі, звесткі, выкладзеныя ў вышэйназваным артыкуле, не адпавядаюць рэчаіснасці. Аўтары звароту паведамляюць, што ДУ «Палац культуры г. Маладзечна» праводзіў акцыю, якая прадугледжвае набыццё двух квіткоў па кошце аднаго. У сувязі з гэтым педагогі разам з сябрамі, сем'ямі з задавальненнем набылі даступныя для іх білеты на канцэрт Народнага артыста РФ Дзмітрыя Харацьяна.

Згодна з пунктам 2 артыкула 3 Закона Рэспублікі Беларусь ад 17 ліпеня 2008 года «Аб сродках масавай інфармацыі» (далей — Закон аб СМІ) яго дзеянне, за выключэннем патрабаванняў аб дзяржаўнай рэгістрацыі сродкаў масавай інфармацыі, распаўсюджваецца на інфармацыйныя рэсурсы (іх складовыя часткі), размешчаныя ў глабальнай камп'ютарнай сетцы Інтэрнэт, з дапамогай якіх ажыццяўляецца распаўсюджванне прадукцыi сродку масавай інфармацыі.

У адпаведнасці з абзацам другiм артыкула 4 Закона аб СМІ сродкі масавай інфармацыі павінны распаўсюджваць інфармацыю, што адпавядае рэчаіснасці.

Акрамя таго, падпунктамі 4.2 і 4.3 пункта 4 артыкула 34 Закона аб СМІ прадпісана, што журналіст сродку масавай інфармацыі абавязаны правяраць дакладнасць атрыманых ім звестак, а таксама прадастаўляць для распаўсюджвання дакладную інфармацыю.

На падставе выкладзенага Міністэрства інфармацыі патрабуе прааналізаваць прадстаўленую інфармацыю і забяспечыць няўхільнае выкананне прадпісанняў Закона аб СМІ.

• 0
• 0
• 0
• 0
• 0
• 0
• 0
• 0