Чытачы «Нашай Нівы» паведамілі, што намеснік старшыні Баранавіцкага гарадскога і раённага суда Васіль Петрыў датычны да карупцыйнай справы, расследаваннем якой займаецца КДБ.
Паводле нашых звестак, Петрыў затрымліваўся аператыўнікамі КДБ, пасля допытаў быў вызвалены.
Петрыў нядаўна сышоў з высокай пасады «па ўласным жаданні» — папярэдне, гэта адбылося акурат пасля затрымання.
У размове з журналістам «Нашай Ніве» экс-суддзя адмовіўся ад каментароў.
«Даруйце, нічога казаць не буду. Чаму сышоў? У сувязі з выхадам у адстаўку. А калі недзе чулі іншае, то ў іх і спытайце», — сказаў Васіль Петрыў.
На пытанне, ці мела месца — а калі мела, то чаму — затрыманне супрацоўнікамі КДБ, ён параіў удакладніць непасрэдна ў КДБ.
Прэс-служба КДБ пакуль не адказала на запыт «Нашай Нівы» што да гэтай сітуацыі.
У Баранавіцкім судзе Петрыў працаваў з 1989 году, калі прыйшоў туды па размеркаванні з юрфака.
Буйных скандалаў за ім не было — хіба што ў 2014 годзе ён аштрафаваў мясцовага праваабаронцу Сяржука Гоўшу за «лаянку» падчас назірання за мясцовымі выбарамі, хаця Гоўша вёў няспынны аўдыёзапіс падзей таго дня і прад'явіў яго ў якасці сведчання, што ніякай лаянкі не было.
