Падчас залевы і навальніцы 20 ліпеня ў Баранавічах на кухню Тамары Дрозд, якая жыве на вуліцы Спакойная, заляцеў вогненны шар, піша Intex-press.
Падчас таго, што здарылася, жанчына стаяла на кухні і смажыла бліны. Акно ў памяшканні было прыадчыненым, распавяла Тамара Дрозд.
«Разам са мной на кухні былі нявестка і ўнучка. Раптам у пакой праз акно ўляцеў маленькі жоўценькі шарык і зваліўся на падлогу наўпрост паміж імі. Пачуўся такі аглушальны звон, што ў мяне ўсё пахаладзела ўнутры».
Гук ад падзення, па словах пенсіянеркі, быў дзіўны, ні на што не падобны. А пасля падзення шарыка адразу ж знік.
«Я ў гэты час малітвы чытала. Можа, гэта дапамагло», - распавядае Тамара Дрозд.
Пасля знікнення шарыка нявестка Тамары Васільеўны разам з унучкай адразу ж выскачылі ў іншы пакой. А жанчына разгубілася і засталася стаяць адна на кухні, баючыся скрануцца з месца.
«Добра, што ніякіх слядоў ад маланкі на падлозе не засталося. Праўда, у суседнім пакоі выйшлі з ладу мадэм і тэлевізар. Але гэта адзіныя наступствы, і сёння муж павёз апаратуру ў рамонт».
Прыкладна пяць гадоў таму шаравая маланка ўжо залятала ў акно Тамары Дрозд. Аднак тады, успамінае жанчына, шарык заляцеў у пакой, а потым вылецеў назад.
«Гэтым разам шаравая маланка вырашыла нас напалохаць і разбіцца на кухні. Унук кажа, каб мы не хваляваліся, маўляў, гэта фізіка, але я да гэтага часу не ў сваёй талерцы».
Цяпер чытаюць
Чаму амерыканцы так ірвуцца на Месяц, што там будуць здабываць? І што да таго беларусам? Тлумачыць беларускі астрафізік1
Каментары