У 2018-м будзем адзначаць стагоддзе абвяшчэння незалежнасці Беларускай Народнай Рэспублікі. Да свята кампанія Symbal.by прэзентавала для шырокага выкарыстання фірмовы стыль #БНР100.
Яго распрацавалі Symbal.by і «Арт Сядзіба» разам з мастаком Максам Пякарскім. Ёсць ужо і серыя сувенірнай прадукцыі, прадстаўленая на сайце Symbal.by у раздзеле «БНР — 100».
Стваральнікі спадзяюцца, што ўзноўленую ўнікальную, дынамічную і неверагодна прыгожую «Пагоню» і фірмовы стыль са словамі Максіма Багдановіча «Не разбіць, не спыніць, не стрымаць» з аднайменнага верша будуць актыўна выкарыстоўвацца падчас мерапрыемстваў і акцый, прысвечаных гэтай важнай падзеі ў гісторыі Беларусі.
Для гэтага крама Symbal.by размясціла на сваім сайце макеты ў добрай якасці для шырокага выкарыстання. Іх можна пампаваць, ставіць на аватаркі, рабіць шпалеры для тэлефонаў і кампутараў, распрацоўваць банеры, расцяжкі, плакаты, афішы, уласныя дызайны, буклеты і паштоўкі…
Выява Пагоні, выкарыстаная ў гэтым дызайне, знойдзеная ў Беларускай эміграцыйнай калекцыі. Яна сустракаецца на пячатках, бланках і дакументах Рады БНР, а таксама Сусветнага аб’яднання беларускай эміграцыі ды іншых арганізацый па-за межамі Беларусі з 50-х гадоў ХХ стагоддзя.
Таксама да стагоддзя Беларускай Народнай Рэспублікі выпушчаныя віншавальныя паштоўкі — іх можна бясплатна ўзяць у краме Symbal.by на Машэрава 18 ці атрымаць у якасці бонуса пры паштовай альбо кур’ерскай замовах тавараў на сайце крамы.
Абвяшчэнне Беларускай Народнай Рэспублікі — гэта адна з галоўных датаў у гісторыі нашай краіны, пачатак доўгага і складанага працэсу фарміравання сучаснай беларускай дзяржаўнасці. І нам разам трэба адзначыць гэтую дату годна!
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА22
Каментары