Беларускі дэпутат атрымаў медаль «Служу Расіі» ад беларускага ж аб'яднання адстаўных разведчыкаў
На сайце дэпутата беларускага парламента Алега Леўшунова з'явілася справаздача з канферэнцыі грамадскага аб'яднання «Ветэраны вайсковай разведкі».
Сайт vybiraj.by звярнуў увагу на тое, што яму там уручылі нагрудны знак расійскага ўзору: «95 год ГРУ ГШ УЗ РФ», на якім напісана «Служім Россіі».
Пры гэтым вядома, што Леўшуноў у ГРУ не служыў — толькі ў паветрана-дэсантных войсках яшчэ за Саветамі.
Вось што пра дзіўную сітуацыю сказаў сам дэпутат.
«Гэта была сустрэча з ветэранскай арганізацыяй, яны ўсе служылі яшчэ за Саветамі. Мяне запрасілі як дэпутата камісіі па працы і сацыяльных пытаннях. Я пагаварыў з імі, расказаў пра сваю работу, гэта чыста сімвалічна ўсё. А ўзнагарода… гэта знак памятны проста. Чаму там напісана «Служым Расіі»? Я не ведаю. Але я не хацеў наўпрост выказваць пратэст, каб не крыўдзіць гэтых людзей», — сказаў нам Леўшуноў.
«Дык ці будзеце насіць знак з такім надпісам?» — спыталіся мы.
«У мяне хапае ўзнагарод і без таго. Я маю дзяржаўную ўзнагароду «За адвагу» ад Беларусі. У нас жа сітуацыя такая: камуністам уручаюцца медалі за подпісам Зюганава, афганцам таксама праз расійскія арганізацыі ўручаюцца», — адказаў дэпутат.
Леўшуноў не стаў казаць, ці толькі яму далі такі знак, ці і іншыя прысутныя яго атрымалі.
«Не магу за іншых казаць, але там былі і прадстаўнікі Мінабароны, і іншых ведамстваў», — адрэзаў ён.
Варта адзначыць, што гэтая загадкавая арганізацыя «ветэранаў разведкі» не мае кантактных тэлефонаў — яны толькі шточацвер збіраюцца ў Доме афіцэраў.
Таму пакуль незразумела, чаму беларуская (па рэгістрацыі) арганізацыя ўручае памятныя знакі ад імя расійскіх структур.
У Мінабароны сітуацыю праясніць таксама не могуць: прэс-афіцэр Уладзімір Макараў сказаў, што ведамства ўзнагароджвае толькі зацверджанымі ў Беларусі ўзнагародамі і памятнымі знакамі, і ён, маўляў, не ў курсе справаў ветэранскіх арганізацый.
Тамара Віннікава прадала свой лонданскі дом, завешаны карцінамі самой сябе ШМАТ ФОТА23
Каментары