У Ніжнім Ноўгарадзе ў суботу, 25 лістапада, адбыўся мітынг у падтрымку апазіцыйнага палітыка Аляксея Навальнага. Улады далі апазіцыянеру пляцоўку на ўскраіне горада і запланавалі ў цэнтры горада на час правядзення мітынгу моладзевы фестываль.
Аляксей Навальны ў Ніжнім Ноўгарадзе.
Як адзначае выданне «Коммерсант», першапачаткова штаб Навальнага прасіў чатыры пляцоўкі, размешчаныя бліжэй да цэнтра. Аднак яму адмовілі, а, акрамя таго, на час правядзення мітынгу быў прызначаны моладзевы фестываль у цэнтры горада. У выніку на акцыю Навальнага прыйшлі больш за тысячу чалавек.
«Выслужваецца перад Крамлём новы губернатар, загнаў нас аж у Сормаўскі раён. Спадзяваўся, што так ніхто не прыйдзе… А я вельмі рады там выступіць. І вельмі ўдзячны тым, хто прыйшоў. Ніжні Ноўгарад — найважнейшы горад нашай кампаніі. І мы тут маем падтрымку», — напісаў Навальны ў сваім блогу. «Выдатны атрымаўся мітынг, тым больш, што ён для мяне быў асаблівым — апошнія 20 сутак арышту я атрымаў за мітынг менавіта ў Ніжнім», — нагадаў палітык.
Аляксей Навальны ладзіць мітынгі ў расійскіх гарадах і плануе балатавацца на выбарах прэзідэнта Расіі ў сакавіку 2018 года.
Кіраўнік Цэнтральнай выбарчай камісіі Эла Памфілава заявіла, што палітык паводле законе зможа ўдзельнічаць у прэзідэнцкіх выбарах толькі пасля 2028 года, бо ён быў абвінавачаны ў цяжкім злачынстве. Гаворка ідзе пра справу «Кіраўлеса», па якой Навальны ў 2013 годзе атрымаў 5 гадоў умоўна. Яго абвінавацілі ў крадзяжы маёмасці.
Каментары