У найбліжэйшы час у міжнародным судзе будзе разглядацца пазоў яшчэ адной расійскай кампаніі супраць Беларусі. Як удалося высветліць TUT.BY, гаворка пра «Маноліум працэсінг», якая пабудавала ў Мінску тралейбуснае дэпо, але не атрымала за яго кампенсацыю. Як лічылі беларускія ўлады — з прычыны зрыву заяўленай інвестдамовы.
У канцы красавіка 2017 года расійская кампанія накіравала ўраду Беларусі даарбітражнае паведамлянне, якое дае магчымасць кіраўніцтву краіны на працягу паўгоддзя знайсці рашэнне ўзніклай праблемы. Як вынікала з дакумента, страты ў форме ўпушчанай выгады ацэнены ў 171 млн даляраў, «экспрапрыяцыя камунальнага аб'екта» — амаль у 37 млн даляраў.
Шасцімесячны перыяд, прадугледжаны для перамоваў у адпаведнасці з Дагаворам аб ЕАЭС, завяршыўся 25 кастрычніка 2017 года. Беларусь накіравала адказ на даарбітражнае паведамлянне «Маноліум працэсінг» у апошні дзень перыяду для перамоваў, але дамовіцца аб урэгуляванні спрэчкі бакоў не ўдалося.
15 лістапада 2017 года «Маноліум працэсінг» апавясціў улады Беларусі аб арбітражы, і з гэтага моманту пачаўся арбітражны разгляд паміж расійскім інвестарам і Рэспублікай Беларусь, растлумачылі TUT.BY у юрыдычнай кампаніі Baker&McKenzie, якая дзейнічае ў інтарэсах «Маноліум працэсінг».
Патрабаванні расійскай кампаніі прад'яўленыя на падставе Дамовы аб ЕАЭС у адпаведнасці з Арбітражным рэгламентам ЮНСІТРАЛ. «Маноліум працэсінг» ужо атрымаў першы адказ Беларусі на сваё паведамленне аб арбітражы, у якім беларускія ўлады ў асноўным пярэчаць супраць кампетэнцыі міжнароднага арбітражу разглядаць гэту спрэчку.
У найбліжэйшы час працэс пяройдзе ў актыўную стадыю. Ужо сфарміраваны склад арбітраў. Адзін прызначаны расійскім бокам, Станімір Аляксандраў (Балгарыя), другі — Беларуссю, Брыджыт Штэрн (Францыя), трэці, старшыня — быў ўзгоднены першым і другім арбітрам — Хуан Фернандэс-Арместа (Іспанія). Яны маюць шырокі досвед вырашэння інвестыцыйных спрэчак паміж інвестарамі і дзяржавамі.
У цяперашні час у арбітражным разглядзе вырашаюцца працэсуальныя пытанні: месца арбітражу, працэсуальны графік і г. д., паведамілі ў Baker&McKenzie. Сума патрабаванняў, прад'яўляных «Маноліум працэсінг», засталася ранейшай — каля 200 млн даляраў.
Варта нагадаць, што ў канцы студзеня расейская кампанія «Гранд Экспрэс» таксама пачала арбітражны разгляд супраць Беларусі.
Нагадаем, у 2003 годзе маскоўская «Маноліум працэсінг» бізнэсмена Арама Екавяна і яго партнёра Андрэя Далгова выйграла тэндар на забудову ўчастка ў межах вуліц Машэрава (былая Варвашэні), Чырвонай і Кісялёва, дзе размяшчалася тралейбуснае дэпо № 1. Меркавалася, што на гэтым месцы інвестар пабудуе элітнае жыллё, 5-зоркавы гатэль і бізнэс-цэнтр на агульную суму 500 млн даляраў. Каб атрымаць участак пад забудову, бізнэсмены пагадзіліся выдаткаваць 15 млн даляраў на новае тралейбуснае дэпо ва Уруччы і пералічыць 1 млн даляраў на будаўніцтва Нацыянальнай бібліятэкі. Аднак будаўніцтва ў цэнтры горада так і не пачалося. А вось будынак новага дэпо быў дабудаваны.
У выніку апошнія некалькі гадоў інвестар і ўлады Мінска высвятлялі справу ў судах і вышэйшых інстанцыях. Інвестар жадаў атрымаць укладзеныя ва Уруччы рэсурсы, раз інвестдагавор з ім быў скасаваны ў 2014 годзе. Але дзяржава налічыла штрафныя санкцыі, якія пакрывалі выдаткі на будаўніцтва новага дэпо. Мінгарвыканкам настойваў на бязвыплатнай перадачы дэпо, паколькі інвестар самавольна займаў зямельны ўчастак плошчай 8 га, бо права часовага карыстання ім ужо скончылася. У рэшце рэшт дэпо па распараджэнні Аляксандра Лукашэнкі перададзена гораду.
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары