Гайдукевіча хвалюе, што Мінск у дзярме і смецці. Ён хоча, каб «Чарнобыльскі шлях» гэта паправіў
Пакуль арганізатары «Чарнобыльскага шляху» рыхтуюцца да сёлетняга шэсця і збіраюць грошы на яго правядзенне, ЛДПБ прапануе іншы занятак на 26 красавіка.
«Ніколі не разумеў гэтага мерапрыемства, а дакладней, яго мэтаў. Але чорт з ім, будзем лічыць гэта рытуалам апазіцыі, калі пару соцень чалавек блукаюць па вуліцы! У гэтым годзе арганізатары запусцілі збор грошай на арганізацыю мітынгу! ЛДПБ прапануе альтэрнатыву! Сабраныя грошы перадайце чарнобыльцам або дзецям, або ў Магілёўскую вобласць, дзе які год у тым ліку па віне мясцовых уладаў не могуць адкрыць музей і бюст Алесю Адамовічу, але не на мітынг з хаджэннем са званом па праспекце, — выказаўся намеснік старшыні ЛДПБ Гайдукевіч. — Ёсць праблема значна важнейшая для ўсіх палітычных партый, і мы можам аб'яднаць намаганні! Нарэшце, надышла вясна, растаў снег, і мы ўбачылі, колькі смецця і бруду, проста дзярма на набярэжных, у месцах адпачынку, дзе гуляюць дзеці і шпацыруюць сям'і. На Мінскім моры наогул страшна хадзіць: усё ў пустых бутэльках! Таму прапаную ўсім разам замест шэсця ўзяць пакеты, граблі, саўкі і выйсці прыбраць гэта дзярмо, яго вельмі шмат. Запрашаем аб'яднаць намаганні, калі па ідэйных меркаваннях хтосьці не можа выйсці 21-га ў дзень Рэспубліканскага суботніка, то давайце выйдзем 26-га, і людзі ўбачаць вынік».
Каментары